लोकसत्ता प्रतिनिधी
पुणे: सासवड रस्त्यावर वडकी गावाजवळ भरधाव बसने मोटारीला धडक दिल्याने मोटारीतील ज्येष्ठ नागरिकाचा मृत्यू झाल्याची घटना घडली. अपघातात मोटारचालकासह तिघे जण जखमी झाले. अपघातानंतर पसार झालेल्या खासगी बस चालकाच्या विरुद्ध पोलिसांनी गुन्हा दाखल केला आहे.
विजय गुंडू शिरगुरे (वय ८५, रा. हडपसर) असे मृत्युमुखी पडलेल्या ज्येष्ठ नागरिकाचे नाव आहे. अपघातात मोटारचालक मयूर विजय शिरगुरे, त्यांचा मुलगा सम्यक आणि विवाहित बहीण ज्योती जितेंद्र गुंडप्पनकर जखमी झाले आहेत. अनुषा विजय शिरगुरे (वय ३०) यांनी या संदर्भात लोणी काळभोर पोलीस ठाण्यात फिर्याद दिली आहे. मोटारचालक मयूर, त्यांचे वडील विजय, मुलगा सम्यक, बहीण ज्योती सासवड रस्त्याने पुण्याकडे निघाले होते. दिवे घाटाच्या पायथ्याशी असलेल्या वडकी गावाजवळ भरधाव खासगी बसने मोटारीला धडक दिली. अपघातात गंभीर जखमी झालेल्या विजय यांचा उपचारांपूर्वीच मृत्यू झाला. पसार झालेल्या बसचालकाचा शोध घेण्यात येत असून पोलीस उपनिरीक्षक दाभाडे तपास करत आहेत.
