पुणे : केरळमध्ये मागील काही दिवसांपासून करोना रुग्णसंख्येत मोठी वाढ नोंदविण्यात आली आहे. याच वेळी केरळमध्ये करोना विषाणूच्या जेएन १ या अतिसंसर्गजन्य उपप्रकाराचा पहिला रुग्ण आढळून आला आहे. या पार्श्वभूमीवर केंद्रीय आरोग्य मंत्रालयाने सर्व राज्ये आणि केंद्रशासित प्रदेशांना सावधगिरी आणि दक्षता बाळगण्याचे निर्देश दिले आहेत.
केंद्रीय आरोग्य सचिव सुशांत पंत यांनी याबाबत सर्व राज्ये आणि केंद्रशासित प्रदेशांना सोमवारी पत्र पाठविले आहे. त्यात म्हटले आहे, की केंद्र आणि राज्यांच्या एकत्रित प्रयत्नांमुळे आपण करोना रुग्णसंख्या कमी राखण्यात यश मिळवले आहे. करोना विषाणूचे नवनवीन उपप्रकार येत असल्याने संसर्गात वाढ होत आहे. अशा वेळी सार्वजनिक आरोग्य व्यवस्थेसमोर आव्हानात्मक स्थिती निर्माण होत आहे. त्याचा सामना करण्यासाठी खबरदारी घेण्याची आवश्यकता आहे.
हेही वाचा >>>मालमत्ता कराबाबत राज्य सरकारचा मोठा निर्णय : मालमत्ता कर नावावर करण्यासाठी महापालिकेत जाण्याची गरज नाही!
राज्यांनी काय उपाययोजना कराव्यात?
– आगामी सणासुदीच्या काळात संसर्ग कमी करण्यासाठी प्रयत्न करा.
– करोनाच्या नवीन प्रकारावर लक्ष ठेवण्यासाठी यंत्रणा कार्यान्वित करा.
– फ्लूसदृश आजारांची जिल्हानिहाय माहिती दररोज जमा करा.
– सर्व जिल्ह्यांमध्ये करोना चाचणीसाठी पुरेशी व्यवस्था करणे.
– आरटीपीसीआर चाचण्यांची संख्या वाढविणे.
– करोना चाचणीचे नमुने जनुकीय क्रमनिर्धारणासाठी पाठविणे.
– करोना संसर्गाबद्दल जनतेत जागरूकता निर्माण करणे.
करोना विषाणूचा उपप्रकार जेएन १ हा केरळमध्ये आढळून आला आहे. अमेरिकेसह युरोपमध्ये या उपप्रकारांमुळे रुग्णसंख्येत वाढ नोंदविण्यात आलेली आहे. महाराष्ट्रात अद्यापपर्यंत हा उपप्रकार आढळून आलेला नाही.- डॉ. राजेश कार्यकर्ते, राज्य समन्वयक, जनुकीय क्रमनिर्धारण
