एक कोटी लोकांना पाच हजार द्या आणि मग लॉकडाऊन करा; भाजपाची मोठी मागणी

“आपल्या राज्यात सर्वाधिक करोना आजाराचे रुग्ण आढळत आहेत. त्यामुळे आता राज्य सरकारकडून लॉकडाऊन करण्याच्या दृष्टीने पावले उचलली जात आहे. या लॉकडाऊनला आमचा विरोध असणार असून लॉकडाउन हा पर्याय नाही. एक वर्ष लोकं कसे जगले हे मातोश्रीमध्ये राहून समजणार नाही,” असा टोला महाराष्ट्र भाजपाचे प्रदेशाध्यक्ष चंद्रकांत पाटील यांनी मुख्यमंत्री उद्धव ठाकरेंना लगावला आहे. “पूर्वी राजा जसा कपडे बदलून वस्त्यांमध्ये फिरायचा तसं फिरावं लागेल. तुम्ही मुख्यमंत्री म्हणून फिरला की तुमच्या सोबत ताफा असेल. त्यामुळे लोक तुमच्याशी लोक मनमोकळं बोलणार नाहीत,” अशा शब्दात मुख्यमंत्री उध्दव ठाकरे यांच्यावर पाटील यांनी निशाणा साधला. पुणे पोलीस आयुक्त अमिताभ गुप्ता यांची भेट घेतल्यानंतर पाटील यांनी प्रसार माध्यमांसोबत संवाद साधला. यावेळी त्यांनी लॉकडाऊन जारी करण्याआधी हातावर पोट असणाऱ्यांना प्रत्येकी पाच हजार देण्याचीही मागणी केली.