लोकसत्ता प्रतिनिधी
पुणे: कुटुंबातील किंवा परिवारातील एखाद्या व्यक्तीने काही गुन्हा केला असेल तर त्यासाठी संपूर्ण परिवाराला किंवा विचारधारा चुकीची आहे, असे म्हणता येणार नाही, असे सांगत भारतीय जनता पक्षाचे प्रदेशाध्यक्ष चंद्रशेखर बावनकुळे यांनी प्रदीप कुरूलकर यांच्या राष्ट्रीय स्वयंसेवक संघ संबंधाबाबत सारवासारव केली.
समीर वानखेडे असो की कुरूलकर दोषांवर कारवाई झाली पाहिजे. सध्या चौकशी सुरू असल्याने त्याबाबत बोलता येणार नाही, असेही त्यांनी सांगितले. भाजप प्रदेश कार्यकारिणी समिती बैठकीसाठी आलेले बावनकुळे यांनी पत्रकार परिषदेत ते बोलत होते. धार्मिक विषय धार्मिक पद्धतीनेच हाताळले पाहिजेत अशी भूमिका त्यांनी त्रंबकेश्वर वादाबाबत मांडली.
आणखी वाचा-बैलगाडा शर्यतीसाठी ११ वर्षे पाठपुरावा करणारे भाजपचे आमदार महेश लांडगे म्हणाले, “हा ऐतिहासिक निकाल…”
भाजप आणि संघ परिवाराशी डॉ. प्रदीप कुरूलकर संबंधित आहेत. त्यामुळे त्यांना वाचविण्याचा प्रयत्न होत आहे. कुरूलकर यांच्यावर देशद्रोहाचा आरोप लावण्यात आलेला नाही, असा आरोप राष्ट्रवादी काँग्रेसचे जितेंद्र आव्हाड यांच्यासह अन्य काही पक्षांनी केला आहे.
यासंदर्भात बोलताना बावनकुळे म्हणाले की, यासंदर्भात चौकशी सुरू आहे. कुटुंबातील किंवा परिवारातील कोणी गुन्हा केला, तर त्याला शिक्षा भोगावी लागेल. त्यासाठी कुटुंबाला किंवा परिवाराला जबाबदार धरता येणार नाही. समीर वानखेडे यांच्यावरील आरोपीची चौकशी सुरू आहे. गुन्हा करणाऱ्यांना कडक शासन झालेच पाहिजे. धार्मिक विषय धार्मिक पद्धतीने हाताळले पाहिजेत. यात कोणताही धर्म मध्ये आणता कामा नये, असेही त्यांनी सांगितले.
