चिंचवड विधानसभेवरून भाजपमध्ये जोरदार रस्सीखेच सुरू आहे. असं असताना आता महाविकास आघाडीचा घटक पक्ष राष्ट्रवादी शरद पवार गटाने देखील चिंचवड विधानसभेवर दावा केला आहे. त्याचबरोबर दिर आणि भावजय यांच्यात सुरू असलेल्या वादावर भाष्य करत शंकर जगताप आणि विद्यमान आमदार अश्विनी लक्ष्मण जगताप यांना शरद पवार गटाची दारे खुली असल्याची अप्रत्यक्षरीत्या ऑफर शरद पवार गटाचे शहराध्यक्ष तुषार कामठे यांनी दिली आहे.
हेही वाचा – पुणे: बकरी ईदनिमित्त गोळीबार मैदान चौक परिसरात उद्या वाहतूक बदल
चिंचवड विधानसभेवरून महायुतीत कलगीतुरा रंगलेला असताना महाविकास आघाडीत देखील चिंचवडवरून धुसफूस सुरू झाली आहे. शरद पवार गटाचे शहराध्यक्ष तुषार कामठे यांनी चिंचवड विधानसभेवर दावा केला आहे. पिंपरी, चिंचवड विधानसभा ही तुतारी चिन्हावरच लढवली जाणार आहे. दोन्ही विधानसभेवर शरद पवार यांची ताकद आहे. २००९ ते आजतागायत इतिहास पाहिल्यानंतर या मतदारसंघावर शरद पवार आणि उद्धव ठाकरे यांना मानणारा मतदार असल्याचे मत तुषार कामठे यांनी व्यक्त केल आहे. दरम्यान, कामठे यांनी जगताप कुटुंबीयांवर भाष्य करत अश्विनी जगताप आणि शंकर जगताप या दोघांसाठी आमच्या पक्षाची दारे नेहमीच खुली असतील असं म्हणत कामठे यांनी शंकर जगताप आणि विद्यमान आमदार अश्विनी लक्ष्मण जगताप यांना पक्षात येण्याची खुली ऑफर दिली आहे. शंकर जगताप आणि अश्विनी लक्ष्मण जगताप या दोघांपैकी एकाला भाजपकडून उमेदवारी मिळाल्यानंतर दुसरा व्यक्ती काय निर्णय घेणार आणि तो कुठल्या पक्षाचा झेंडा हाती घेऊन लढणार हे आगामी काळात स्पष्ट होईल.
