पिंपरी : वाढत्या इलेक्ट्रिक कचऱ्याची (ई-वेस्ट) विल्हेवाट लावण्यासाठी महापालिका, ग्रीन स्केप आणि ईसीए यांच्या संयुक्त विद्यमाने भोसरीत ई-वेस्ट रिसायकलिंग, प्लॅस्टिक रिसायकलिंग सेंटर उभारण्यात आले आहे. या दोन्ही संस्था शहरातील विविध भागात जाऊन ई-वेस्ट संकलित करत असून, नागरिकांना ई-वेस्टसाठी किलोनुसार पैसे देण्यास सुरुवात करण्यात आली आहे. त्यामुळे ई-वेस्ट द्या आणि पैसे कमवा, ही संकल्पना शहरात यशस्वी होताना दिसून येत आहे.
पिंपरी-चिंचवड शहर परिसरात हिंजवडी, तळवडे आयटी पार्क आहेत. नागरिकांचा दिवसेंदिवस मोबाईल फोन, लॅपटॉप आदी वस्तूंचा वापर वाढला आहे. मात्र, या वस्तू नादुरुस्त झाल्या की अनेकजण भंगारात टाकून देतात. वाढत्या लोकसंख्येनुसार ई-वेस्टही सातत्याने वाढत आहे. ई-वेस्टचा पुनर्वापर होत नसल्याने पर्यावरणाचा प्रश्नही गंभीर होत आहे. त्यामुळे महापालिका आणि शहरातील काही पर्यावरण प्रेमी सामाजिक संस्थांच्या माध्यमातून गेल्या काही वर्षांपासून ई-वेस्ट संकलन मोहीम राबविण्यात येत आहे. गेल्या पावणेदोन वर्षांत शहरातील विविध भागांतून तीन हजार ९६२ किलो ई-वेस्टचे संकलन करण्यात आले आहे.
हेही वाचा – पुणे : प्रियकराबरोबर पळून जाताना पत्नीने घरातील दागिने, रोकड चोरली
आता ई-वेस्टसाठी नागरिकांना मोबदला देण्यास सुरुवात झाली आहे. त्यानुसार लॅपटॉप, फ्रिज, टिव्ही, वातानुकूलित यंत्राना दहा रुपये किलो, तर इतर वेस्टसाठी आठ रुपये किलो दराने पैसे दिले जात आहेत. नागरिकांनी ई-वेस्ट दिले की जागेवरच पैसे दिले जातात.
ई-वेस्ट संकलनासाठी शिबीर
आयटी अभियंत्याचे वास्तव्य असलेल्या शहरातील हिंजवडी, तळवडे, वाकड, रावेत, पिंपळे-सौदागर, पिंपळेगुरव, निगडी, प्राधिकरण, संभाजीनगर, चिंचवड या भागात अभियंत्यांच्या सुट्टीच्या दिवशी म्हणजे शनिवारी आणि रविवारी ई-वेस्ट संकलनासाठी शिबीर लावण्यात येणार आहेत.
फ्रिज, वॉशिंग मशीन, फॅन, मायक्रोवेव्ह, वातानुकूलित यंत्रे, सीडी-डीव्हीडी प्लेयर, होम थिएटर्स, कॉम्प्यूटर, पेन ड्राइव्ह, हेड फोन्स, प्रिंटर्स, डिजिटल कॅमेरा, मोबाईल, चार्जर, टीव्ही, लॅपटॉप, व्हिडीओ कॅमेरा असे ई-वेस्ट स्वीकारले जाते. ट्यूबलाइट, सीएफएल बल्ब्स, काच स्वीकारल्या जात नाहीत.
शाळांमध्ये जनजागृती
ई-वेस्टबाबत शाळांमध्ये जनजागृती ई-वेस्टच्या वाढत्या समस्येबाबत तरुण पिढीमध्ये जनजागृती व्हावी, यासाठी शहरातील शाळा, महाविद्यालयांमध्ये जनजागृती करण्यात येणार आहे. तसेच ई-वेस्टवर कशा पद्धतीने प्रक्रिया करण्यात येते, याबाबतचे मार्गदर्शनपर चित्रफिती दाखविण्यात येणार आहेत.
हेही वाचा – झोपेच्या गोळ्यांचा नशेसाठी वापर; येरवड्यात गोळ्या विकणाऱ्या एकास पकडले
इलेक्ट्रॉनिक वस्तूंचा वापर वाढला आहे. ई-वेस्टमध्ये सातत्याने वाढ होत आहे. त्यासाठी पर्यावरण विभागाच्या वतीने सामाजिक संस्थांच्या मदतीने संकलन मोहीम राबविण्यात येत आहे. त्याला नागरिकांचा चांगला प्रतिसाद मिळत आहे, असे पिंपरी – चिंचवड महापालिका, अतिरिक्त आयुक्त जितेंद्र वाघ म्हणाले.
जितेंद्र वाघ अतिरिक्त आयुक्त
पिंपरी-चिंचवड महापालिका
………….
शहराच्या विविध भागात दोन वाहनांच्या माध्यमातून ई-वेस्ट संकलित करण्यात येत आहे. ई-वेस्ट दिले की नागरिकांना जागेवरच पैसे देण्यात येतात. ई-वेस्टची शास्त्रीय पद्धतीने विल्हेवाट लावण्यात येणार आहे, असे ग्रीन स्केप संस्थेचे रुपेश कदम म्हणाले.