लोकसत्ता प्रतिनिधी
पुणे : महाविद्यालयीन तरुणीचा विनयभंग केल्याने जाब विचारणाऱ्या आईला एकाने पट्ट्याने मारहाण केल्याची घटना वडगाव शेरी भागात घडली. तरुणीवर कर्कटकने हल्ला करून आरोपी तरुण पसार झाला.
शाहीद कलीम शेख (रा. वडगाव शेरी) असे गुन्हा दाखल केलेल्या तरुणाचे नाव आहे. याबाबत महाविद्यालयीन तरुणीने चंदननगर पोलीस ठाण्यात फिर्याद दिली आहे. तरुणी वडगाव शेरी भागातून ये-जा करत असताना आरोपी शाहिद तिचा पाठलाग करून तिला त्रास देत होता. शाहीदने तरुणीची छेड काढल्याने तिने या घटनेची माहिती आईला दिली. त्यानंतर तिची आई वडगाव शेरीतील दिगंबरनगर भागात गेली.
आणखी वाचा-भीमा कोरेगाव विजयस्तंभाला आंबेडकरी अनुयायांचे अभिवादन; अलोट गर्दी
आईने शाहिदकडे जाब विचारला. तेव्हा शाहिदने तरुणीच्या आईला पट्ट्याने मारहाण केली.त्यावेळी तरुणीने शाहिदला प्रतिकार केला. शाहिदने त्याच्याकडील कर्कटकने तरुणीवर हल्ला केला. तरुणीच्या डोक्यात कर्कटक मारल्याने ती जखमी झाली. त्यानंतर शाहिद तेथून पसार झाला. सहायक पोलीस निरीक्षक घोरपडे तपास करत आहेत.
