लोकसत्ता प्रतिनिधी
पुणे : सिमेंट मिक्सरच्या धडकेत दुचाकीस्वार महाविद्यालयीन तरुणाचा मृत्यू झाल्याची घटना लोहगाव परिसरातील डी. वाय पाटील महाविद्यालय रस्त्यावर घडली.
स्वप्नील प्रकाश साळवे (वय २२, रा. भालकुंड, जि. परभणी) असे मृत्युमुखी पडलेल्या दुचाकीस्वार तरुणाचे नाव आहे. याप्रकरणी सिमेट मिक्सरचालक वेंकट गुरुप्पा पवार (वय ४५, रा. खांदवे निवास, निरगुडी रस्ता, लोहगाव) याच्याविरुद्ध गुन्हा दाखल करण्यात आला आहे. याबाबत स्वप्नीलचे मामा दिलीप धोडिंबा साबळे (वय ५३, रा. डोंगरे वस्ती, निघोज, चाकण) यांनी विमानतळ पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, स्वप्नील साळवे एका महाविद्यालयात ओैषध निर्माण शास्त्र अभ्यासक्रम करत होता. स्वप्नील आणि त्याचे मित्र वाघोली भागात भाडेतत्त्वावर खोली घेऊन राहतात. सोमवारी सकाळी अकराच्या सुमारास लोहगाव येथील डी. वाय. पाटील महाविद्यालय रस्त्याने निघाला होता. त्या वेळी भरधाव सिमेंट मिक्सरने दुचाकीला पाठीमागून धडक दिली. दुचाकीस्वार साळवे गंभीर जखमी झाला. अपघातानंतर पसार झालेल्या मिक्सरचालकाला पोलिसांनी ताब्यात घेतले. पोलीस उपनिरीक्षक अक्षय सोनवणे तपास करत आहेत.
हडपसर भागात दुचाकीस्वार तरुणाचा मृत्यू
हडपसर-सासवड रस्त्यावर फुरसुंगी परिसरात भरधाव वाहनाच्या धडकेत दुचाकीस्वार तरुणाचा मृत्यू झाल्याची घटना घडली. सूरज शरद धायडे (वय २३, रा. पॉवर हाऊस, फुरसुंगी, हडपसर) असे मृत्युमुखी पडलेल्या दुचाकीस्वाराचे नाव आहे. याप्रकरणी पसार झालेल्या वाहनचालकाविरुद्ध गुन्हा दाखल करण्यात आला आहे. याबाबत आकाश शरद धायडे (वय १९) याने फुरसुंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, दुचाकीस्वार सूरज रविवारी रात्री साडेअकराच्या सुमारास हडपसर-सासवड रस्त्याने निघाला होता. फुरसुंगीतील पॉवर हाऊससमोर भरधाव वाहनाने दुचाकीस्वार सूरजला धडक दिली. अपघातात गंभीर जखमी झालेल्या सूरजचा उपचारांपूर्वीच मृत्यू झाला होता. पोलीस उपनिरीक्षक तेहसीन बेग तपास करत आहेत.