लोकसत्ता प्रतिनिधी
पुणे : मेट्रोकडून सुरू असलेल्या कामांची पुर्तता वेगाने करण्याची आवश्यकता आहे. त्यामुळे परिसरातील वाहतूक कोंडी कमी होण्यास मदत होणार आहे. येत्या तीन महिन्यात मेट्रोची कामे पुर्ण करण्याची सूचना पोलीस आयुक्त अमितेशकुमार यांनी बुधवारी आयोजित बैठकीत मेट्रो प्रशासनाला दिल्या.
पोलीस, तसेच मेट्रोतील अधिकाऱ्यांची बैठक बुधवारी पार पडली. यावेळी मेट्रो अधिकाऱ्यांसह, वाहतूक विभागाचे अतिरिक्त पोलीस आयुक्त मनोज पाटील, पोलीस उपायुक्त अमोल झेंडे यांच्यासह विविध अधिकारी उपस्थित होते. गणेशखिंड रस्त्यावर रेंजहिल्स कोपरा परिसरात शिवाजीनगर- हिंजवडी मेट्रो मार्गिका खांबाच्या उभारणीसाठी २९ ऑगस्ट २०२३ पासून वाहतूकीत बदल करण्यात आला आहे. त्यामुळे या भागात वाहतूक कोंडी होत असून, वाहनचालकांसह रहिवाशांना त्रासाला सामोरे जावे लागत असल्याच्या तक्रारी आल्या आहेत.
आणखी वाचा- नवी पेठेतील बंगल्यातून पाच लाखांचे दागिने चोरीला
वाहतूक कोंडीमुळे पोलिसांना रोषाला सामोरे जावे लागत आहे. त्यापार्श्वभूमीवर मेट्रोचे कामे वेगाने पूर्ण करा, अशा सूचना पोलीस आयुक्त अमितेश कुमार यांनी बैठकीत दिल्या. मेट्रोने कामे त्वरीत पूर्ण करण्यास प्राधान्य द्यावे, असे त्यांनी सांगितले.
