विवाहाच्या आमिषाने संगणक अभियंता तरुणीची ३४ लाखांची फसवणूक; बाणेर पोलिसांकडून एकास अटक

तरुणीने त्याच्या कुटुंबीयांबाबत विचारणा केली. तेव्हा त्याने आई-वडिलांचे काही वर्षांपूर्वी निधन झाले असून, भाऊ दुबईत नोकरीला आहे, अशी बतावणी केली. तरुणीने त्याच्या बोलण्यावर विश्वास ठेवला. दोघांमध्ये संवाद वाढला. त्यानंतर एका मित्राने माझी आर्थिक फसणूक केली असून, पैसे न भरल्यास मला कारागृहात जावे लागेल, अशी बतावणी केली. आपण लवकरच विवाह करु, असेही त्याने तिला सांगितले. मोबाइल संचात बिघाड झाल्याचे सांगून त्याने तरुणीकडून महागडा मोबाइल संच वापरास घेतला. अडचणीत असल्याने त्वरीत आर्थिक मदत हवी आहे, असे सांगून त्याने तरुणीला तातडीने पैसे पाठविण्यास सांगितले. तरुणीने ऑनलाइन पद्धतीने पैसे पाठविले. माहिती-तंत्रज्ञान कंपनीतील व्यवस्थापकांकडून वेळेवेळी १५ लाख रुपये घेतले, तसेच खासगी वित्तीय संस्थेकडून तिने कर्ज काढून आरोपी साईशला पैसे पाठविले. गेल्या दीड ते पावणेदोन वर्षात त्याने तरुणीकडून वेळोवेळी ३३ लाख ८२ हजार रुपये घेतले. तरुणीने त्याच्याकडे विवाहाबाबत विचारणा सुरू केली. तेव्हा त्याने उडवाउडवीची उत्तरे दिली. फसवणूक झाल्याचे लक्षात आल्यानंतर तिने पोलिसांकडे तक्रार दिली.

बाणेर पोलिसांनी तपास करुन आरोपी साईशला अटक केली. सहायक पोलीस निरीक्षक अनिल केकाण तपास करत आहेत. मध्यंतरी बिबवेवाडी भागातील एका डाॅक्टर तरुणीने दवाखान्यात विषारी ओैषध पिऊन आत्महत्या केली होती. तरुणीला सांगलीतील एकाने डाॅक्टर तरुणाने विवाहाचे आमिष दाखवून तिच्याकडून पैसे घेतले होते. तरुणीने त्याच्याकडे विवाहाबाबत विचारणा केली. तेव्हा त्याने विवाहित असल्याचे तिला सांगितले होते. डाॅक्टर तरुणीला मानसिक धक्का बसल्याने तिने बिबवेवाडीतील दवाखान्यात आत्महत्या केली होती. याप्रकरणी बिबवेवाडी पोलिसांनी डाॅक्टर तरुणाला नवी मुंबईतून अटक केली होती.