महाराष्ट्र राज्य परीक्षा परिषदेमार्फत शासकीय संगणक टंकलेखन प्रमाणपत्र परीक्षा आणि स्पेशल स्कील इन कम्प्युटर टायपिंग इन्स्ट्रक्टर्स अँड स्टुडन्टस् या दोन्ही परीक्षा २५ जुलै ते २३ ऑगस्ट या कालावधीत ऑनलाइन पद्धतीने एकूण २८१ परीक्षा केंद्रांवर होणार आहेत. या परीक्षांची प्रवेशपत्रे परीक्षा परिषदेच्या संकेतस्थ‌ळावर संस्था लॉगइनद्वारे ६ जुलैपासून देण्यात आली आहेत.
परिषदेच्या आयुक्त शैलजा दराडे यांनी प्रसिद्धिपत्रकाद्वारे ही माहिती दिली. संबंधित संगणक टंकलेखन संस्थाचालकांनी त्यांच्या संस्थेतील सर्व परीक्षार्थींची प्रवेशपत्रे http://www.mscepune.in या संकेतस्थळाद्वारे डाऊनलोड करून शिक्का आणि स्वाक्षरीसह संबंधित परीक्षार्थींना वितरित करण्याची व्यवस्था करावी. विद्यार्थ्यांनी परीक्षा केंद्रावर येताना प्रवेशपत्रासोबत परीक्षा परिषदेने पुरविलेल्या नमुन्यातील स्वयंघोषणापत्र आणणे आवश्यक आहे.
संस्थाचालकांनी प्रवेशपत्र दिल्यापासून परीक्षेपूर्वी (विद्यार्थ्याचा फोटो व ओळखपत्रासह) समक्ष कार्यालयीन वेळेत येऊन प्रवेशपत्रावर सक्षम प्राधिकारी, महाराष्ट्र राज्य परीक्षा परिषद, पुणे यांची सही आणि शिक्का घ्यावा, तरच संबंधित विद्यार्थ्यास परीक्षेला बसता येईल. सर्व परीक्षार्थ्यांनी त्यांची ऑनलाइन प्रवेशपत्रे आपल्या संगणक टंकलेखन संस्थेतून परीक्षेपूर्वी घ्यावीत. परीक्षा सुरू झाल्यानंतर कोणतीही दुरुस्ती करून दिली जाणार नसल्याचेही स्पष्ट करण्यात आले.
