पिंपरी-चिंचवडमध्ये गाजरं दाखवून भाजपविरोधात आंदोलन

‘अच्छे दिन’ आणण्याची स्वप्ने दाखवणाऱ्या राज्य आणि केंद्रातील भाजप सरकारचा पिंपरी-चिंचवडमधील काँग्रेसने गुरुवारी निषेध नोंदवला. शुक्रवारी २६ मे रोजी मोदी सरकारच्या सत्ता स्थापनेला तीन वर्षे पूर्ण होत आहेत. यापार्श्वभूमीवर काँग्रेसने ‘गाजर दिखाओ’ आंदोलन केले. सत्तेमध्ये येण्यापूर्वी भाजप सरकारने जनतेला मोठ्या प्रमाणात आश्वासनं दिली. मात्र, त्याची पूर्तता झाली नसल्याचा आरोप यावेळी करण्यात आला. काँग्रेस कार्यकर्त्यांनी रस्त्यावरील नागरिकांना गाजरे वाटून भाजप सरकार तीन वर्षांत अपयशी ठरल्याची घोषणाबाजी केली. या आंदोलनाच्या माध्यमातून सरकारने जनतेला गाजरे दाखवली, असे सांगण्याचा काँग्रेसने प्रयत्न केला.