आठव्या मजल्यावरुन पडल्याने बांधकाम मजुराचा मृत्यू

राजकुमार प्रजापती (वय ४५, रा. काशीराम कॉलनी, अस्ती, ता. फतेहपूर, उत्तर प्रदेश) असे मृत्युमुखी पडलेल्या बांधकाम मजुराचे नाव आहे. याबाबत प्रजापती यांचा मुलगा आशिषकुमार (वय २०) याने फुरसुंगी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, राजकुमार प्रजापती हे हडपसर-सासवड रस्त्यावरील एका नियोजित गृहप्रकल्पात आठव्या मजल्यावर काम करत होते. त्या वेळी तोल जाऊन पडल्याने प्रजापती यांचा मृत्यू झाला. ठेकेदाराने सुरक्षाविषयक उपाययोजना न केल्याने दुर्घटना घडल्याचे तपासात उघडकीस आले. बांधकामाच्या ठिकाणी संरक्षक विषयक जाळी बसविण्यात आली नसल्याचे उघडकीस आले. दुर्घटनेस जबाबदार असल्याप्रकरणी ठेकेदाराविरुद्ध गुन्हा दाखल करण्यात आला असून, सहायक पोलीस निरीक्षक नानासाहेब जाधव तपास करत आहेत.