खुशखबर : पिंपरी-चिंचवडमधील पाच करोना बाधितांची पहिली चाचणी निगेटिव्ह

पिंपरी-चिंचवडमध्ये शुक्रवारी तीन करोनामुक्त तरुणांना डिस्चार्ज देण्यात आला होता. हे तिघेही दुबईहून पिंपरी-चिंचवड शहरात परतले होते. याच तीन पैकी एका तरुणाच्या कुटुंबातील चार व्यक्तींना करोनाची बाधा झाली असून त्यांच्यावर भोसरी येथील नवीन रुग्णालयात उपचार सुरू आहेत. दरम्यान, त्यांची १४ दिवसानंतरची पहिली चाचणी ही निगेटिव्ह आली आहे. तर थायलंड येथून आलेल्या एका व्यक्तीचीदेखील पहिली चाचणी निगेटिव्ह आली आहे.

काही दिवसांपूर्वी करोना चाचणी पॉझिटिव्ह आली असल्याचे समजताच भोसरी रुग्णालयातून पलायन केले होते. त्यानंतर मोठ्या प्रयत्नाने पोलिसांनी आणि आरोग्य कर्मचाऱ्यांनी शोधून काढत पुन्हा रुग्णालयात दाखल केले होते. करोना बाधित पाच व्यक्तींची दुसरी चाचणी निगेटिव्ह आल्यास त्यांना डिस्चार्ज देण्यात येणार आहे. दरम्यान, त्यांच्या दुसऱ्या टेस्टचा अहवाल रात्री उशिरापर्यंत हातात येईल असं डॉक्टरांनी सांगितले आहे.