Pune Shivshahi Bus Rape Case Update : पुण्यातील स्वारगेट एसटी बस स्थानकातील एका नादुरुस्त शिवशाही बसमध्ये एका २६ वर्षीय तरुणीवर मंगळवारी (२५ फेब्रुवारी) पहाटे बलात्कार झाला. हा प्रकार बुधवारी सकाळी उजेडात आला. सर्वपक्षीय नेते आणि संघटनांनी या प्रकरणी आंदोलन केल्यानंतर तपासाला वेग आला अन् आज पहाटे त्याला त्याच्या गावातून अटक करण्यात आली आहे. ड्रोनची नजर, पोलीस पथकांचं शौर्य अन् श्वान पथकांच्या कामगिरीमुळे उसाच्या शेतात लपून बसलेला आरोपी दत्तात्रय गाडे याला पोलिसांनी अटक केली. मात्र, आता यावरून श्रेयवाद सुरू असल्याची चर्चा आहे. या चर्चेवर पुणे पोलीस आयुक्त अमितेश कुमार यांनी उत्तर दिलं आहे. ते पत्रकार परिषदेत बोलत होते.
स्वारगेट पोलीस आणि गुन्हे शाखा यांच्यात आरोपीला पकडण्यावरून श्रेयवाद सुरू असल्याची चर्चा आहे, असा प्रश्न पुणे पोलीस आयुक्त अमितेश कुमार यांना विचारण्यात आला. त्यावर ते म्हणाले, “यात कोणाचाही श्रेयवाद सुरू नाही. मी सांगितलं की हे सांघिक प्रयत्न आहे. पुणे शहर पोलीस दलाचे अधिकारी आणि कर्मचारी प्रत्यक्ष आणि अप्रत्यक्षरित्या सहभागी होते. गुन्हे शाखा विभाग, स्वारगेट पोलीस पथक, झोन २ चे पथक गुणाट गावात तळ ठोकून बसले होते. काही अधिकारी तिथून तीन दिवसांत हलले नाहीत. दिवसरात्र काम करत होते. रात्री झोपलेही नाहीत. अशाप्रकराची कामगिरी पोलीस दलाने केली आहे. पोलीस अधिकारी आणि कर्मचाऱ्यांचे अभिनंदन.”
स्थानिकांचा करणार सत्कार
“एसटी स्थानकातील २३ सीसीटीव्ही कॅमेरा आणि स्थानकाबाहेरील ४८ सीसीटीव्ही फुटेज तपासल्यानंतर दीड ते दोन तासांत आम्ही आरोपीची ओळख पटवली होती. गेल्या दोन दिवसांपासून आम्ही आरोपीच्या गावात जावून शोधमोहिम घेत होतो. पण आरोपी तेव्हा सापडला नाही. अखेर तो आज सापडला आहे. याकरता मी गावातील नागरिकांचे धन्यवाद देतो. त्या गावात भेट देऊन नागरिकांचा सत्कार करणार आहोत. तिथे ज्या-ज्या लोकांनी मदत केली, त्यांचं विशेष अभिनंदन करणार आहोत”, असं पुणे पोलीस आयुक्त अमितेश कुमार म्हणाले.
शेवटची माहिती देणाऱ्याला १ लाखांचं बक्षिस
“शेवटच्या माहितीवरून आम्ही आरोपीला पकडलं. शेवटची माहिती आली की तो कुठेतरी पाणी पिण्यासाठी आला होता. तो कोणालातरी दिसला आणि मग तो तिथून पळाला. ड्रोनच्या सहाय्याने जी दिशा दिसली, त्यातून त्याला अटक करण्यात आली. ज्याने शेवटची माहिती दिली, त्याला एक लाखांचं बक्षिस देण्यात येणार आहे. त्याव्यतिरिक्त गावासाठी काय करता येणार, याचाही आम्ही विचार करणार आहोत”, असं अमितेश कुमार म्हणाले.
आरोपीने केला आत्महत्येचा प्रयत्न
पुणे पोलीस आयुक्त म्हणाले, “प्राथमिक वैद्यकीय चाचणीनुसार आरोपीच्या गळ्यावर दोरीचे वळ आहेत, या वळानुसार त्याने आत्महत्या करण्याचा प्रयत्न केला होता, असं आरोपीने सांगितलं आहे. परंतु, दोरी तुटल्यामुळे आणि इतर लोक आल्यामुळे त्याचा जीव वाचला.” “त्याने खरंच आत्महत्येचा प्रयत्न केला होता का याची चौकशी करण्याकरता पथक तिथे पाठवण्यात येणार आहे. परंतु प्राथमिक वैद्यकीय चाचणीनुसार त्याच्या गळ्यावर दोरीचे वळ होते”, असं आयुक्त अमितेश कुमार म्हणाले.
