पुणे : मोटारीच्या धडकेत आरसा तुटल्याने जाब विचारणाऱ्या मोटारचालक आणि त्याच्या पत्नीला शिवीगाळ करुन धक्काबुक्की करण्यात आल्याची घटना कल्याणीनगर भागात घडली. याप्रकरणी मोटारचालकाविरुद्ध विनयभंग, तसेच धक्काबुक्की केल्याप्रकरणी गुन्हा दाखल करण्यात आला.
याप्रकरणी एका मोटारचालकाविरुद्ध गुन्हा दाखल करण्यात आला आहे. याबाबत एका महिलेने येरवडा पोलीस ठाण्यात फिर्याद दिली आहे. तक्रारदार महिला आणि तिचे पती कल्याणीनगर भागातून रविवारी (८ डिसेंबर) रात्री साडेआठच्या सुमारास मोटारीतून निघाले होते. कल्याणीनगर परिसरातील मेट्रो पुलाजवळ भरधाव वेगाने आलेल्या मोटारीने तक्रारदाराच्या महिलेच्या मोटारीला धडक दिले. धडकेत मोटारीचा आरसा तुटला. त्यामुळे महिलेच्या पतीने मोटारचालकाला जाब विचारला. मोटारचालकाने रस्त्यात वाद घालण्यास सुरुवात केली. मोटार रस्त्यात आडवी लावली. त्याने मोटारचालकाला धक्काबुक्की केली. शिवीगाळ करणाऱ्या आरोपी मोटारचालकाला समजाविण्यासाठी महिला मोटारीतून उतरली. तेव्हा आरोपीने तिच्याशी अश्लील कृत्य करुन शिवीगाळ, तसेच धक्काबुक्की केली. सहायक पोलीस निरीक्षक महेश लामखेडे तपास करत आहेत.
