पुण्यातील वानवडी भागात गाड्याची तोडफोड आणि महिलांना धक्काबुक्की केल्याने नागरिकांनी केलेल्या मारहाणीत एका सराईत गुन्हेगाराचा मृत्यू झाला. ही घटना शनिवारी रात्रीच्या सुमारास घडली. या प्रकरणी वानवडी पोलीसांनी खुनाचा गुन्हा दाखल केला आहे. अक्षय सोनावणे (वय २८, रा. दरोडे वस्ती, वानवडी) असे मृत्यू झालेल्या गुन्हेगाराचे नाव आहे.
पोलिसांनी दिलेल्या माहितीनुसार, शनिवारी रात्री दहा वाजण्याच्या सुमारास अक्षय सोनावणे याने वानवडी भागात आल्यावर नागरिकांच्या वाहनांची तोडफोड करण्यास सुरुवात केली. ही तोडफोड थांबवण्याचा प्रयत्न काही नागरिक आणि महिलांनी केला. मात्र अक्षयने महिलांना धक्काबुक्की आणि मारहाण केली. यामुळे तेथील नागरिक संतप्त झाले. सर्व जण एकत्रित येत अक्षयला बेदम मारहाण केली. यामध्ये अक्षयचा मृत्यू झाला असून या घटनेचा तपास सुरू असल्याचे सांगण्यात आले.
