पिंपरी : कर संकलन विभागाकडून मालमत्ता कराची चालू मागणी व थकीत कर वसुलीसाठी जोरदार मोहीम सुरू आहे. मात्र, थकबाकीदारांसाठी महापालिका अभय योजना लागू करणार आहे का? याबाबत नागरिकांकडून सातत्याने विचारणा होऊ लागली होती. त्यावर महापालिकेची अभय किंवा विलंब शास्ती (दंड) माफीची योजना १ एप्रिल २०२२ पासून कायमस्वरुपी बंद करण्यात आली आहे. त्यामुळे थकबाकीदारांना संपूर्ण कर भरावाच लागणार असल्याचे महापालिका आयुक्त शेखर सिंह यांनी स्पष्ट केले आहे.
पिंपरी-चिंचवड शहरात सहा लाख २२ हजार नोंदणीकृत मालमत्ता आहेत. या मालमत्ताधारकांडून महापालिका कर वसूल करते. यासाठी शहरातील विविध भागांत कर संकलानासाठी १७ विभागीय कार्यालये आहेत. कर संकलन विभागाला २०२३-२४ या आर्थिक वर्षात एक हजार कोटी रुपयांचे उदिष्ट देण्यात आले आहे. यासाठी कर संकलन विभागाने बड्या थकबाकीदारांच्या मालमत्ता जप्ते करणे, वर्तमानपत्रात नावांची यादी छापणे, नळजोड खंडित करणे, थकबाकीदारांची नावे जाहीर करण्यासह विविध प्रकारे करवसुलीसाठी प्रयत्न सुरू आहेत.
हेही वाचा >>>भाजपकडून पुण्यात मुरलीधर मोहोळ यांना उमेदवारी जाहीर
थकबाकीदारांकडे पालिकेचे पथक मालमत्ता जप्त किंवा कर वसूल करण्यासाठी गेल्यानंतर अनेक नागरिक अभय योजना कधी लागू होणार? किंवा शास्तीमध्ये माफी मिळणार आहे का? अशी विचारणा करत आहेत. महापालिकेची अभय योजना किंवा विलंब शास्ती माफीची योजना १ एप्रिल २०२२ पासून कायमस्वरुपी बंद करण्यात आली आहे. तेव्हापासून महापालिका मालमत्ता कर विलंब दंडासह वसूल करत आहे. यापुढील काळात थकबाकीदारांसाठी कोणतीही अभय योजना लागू केली जाणार नाही. त्यामुळे थकबाकीवर दंडाची रक्कम वाढण्यापेक्षा तत्काळ कर भरावा, असे आवाहन आयुक्त सिंह यांनी केले आहे.
८३० कोटींचा कर वसूल
चालू आर्थिक वर्षात आजअखेरपर्यंत ८३० कोटींचा कर वसूल झाला आहे. उर्वरित १८ दिवसांमध्ये जास्तीत-जास्त कर वसूल करण्यासाठी विभागाचे प्रयत्न सुरू आहेत.
