राष्ट्रीय आर्थिक दुर्बल घटक शिष्यवृत्ती (एनएमएमएस), अपंग विद्यार्थ्यांसाठीची मॅट्रिक पूर्व शिष्यवृत्ती, अल्पसंख्याक विद्यार्थ्यांसाठीची प्री-मॅट्रिक शिष्यवृत्ती, अल्पसंख्याक विद्यार्थ्यांसाठीची बेगम हजरत महल राष्ट्रीय शिष्यवृत्ती आता राज्य शासनाच्या शिक्षण योजना संचालनालयातर्फे राबवल्या जात आहेत. या शिष्यवृत्तीच्या अर्जांसाठी मुदतवाढ देण्यात आली असून, आता विद्यार्थ्यांना ३१ ऑक्टोबरपर्यंत ऑनलाइन अर्ज करता येईल.शिक्षण योजना संचालनालयाचे संचालक कृष्णकुमार पाटील यांनी प्रसिद्धिपत्रकाद्वारे ही माहिती दिली. शिष्यवृत्ती योजनांची माहिती, पात्रतेचे निकष आणि अर्ज http://www.scholarships.in या संकेतस्थळावर देण्यात आले आहेत. अल्पसंख्याक समाजातील विद्यार्थ्यांसाठीच्या प्री-मॅट्रिक शिष्यवृत्तीअंतर्गत नवीन विद्यार्थ्यांसाठी महाराष्ट्र राज्याचा धर्मनिहाय कोटा २,८५,४५१ निश्चित केला आहे. सद्यस्थितीत  ३ लाख ८२ हजार ५१४ नवीन अर्ज प्राप्त झाले आहेत. तसेच नुतनीकरणासाठी ७ लाख २४ हजार ४९५ अर्ज नूतनीकरणासाठी प्राप्त झाले आहेत. पात्र विद्यार्थ्यांना एक हजार ते दहा हजार रुपये शिष्यवृत्ती दिली जाते.

या बातमीसह सर्व प्रीमियम कंटेंट वाचण्यासाठी साइन-इन करा
Skip
या बातमीसह सर्व प्रीमियम कंटेंट वाचण्यासाठी साइन-इन करा

हेही वाचा >>>मुंबई : गिरगावातील गोदामास भीषण आग ; लगत उभी वाहने जळून खाक

बेगम हजरत महल राष्ट्रीय शिष्यवृत्तीसाठी आतापर्यंत ७५ हजार ८४३ अर्ज प्राप्त झाले आहेत. पात्र विद्यार्थ्यांना नववीसाठी पाच हजार आणि दहावीसाठी सहा हजार रुपये शिष्यवृत्ती दिली जाते. एनएमएमएस शिष्यवृत्तीसाठी खाजगी, विनाअनुदानित, स्वयंअर्थसहाय्यित, केंद्रीय विद्यालय, जवाहर नवोदय विद्यालय,  शासनाच्या वसतिगृहाच्या सवलती घेणारे विद्यार्थी पात्र ठरत नाहीत. गुणवत्ता यादीत निवड झालेल्या विद्यार्थ्यांना बारा हजार रुपये शिष्यवृत्ती मिळते.  तर अपंग विद्यार्थ्यांसाठीच्या मॅट्रिक पूर्व शिष्यवृत्ती योजनेचा लाभ शासकीय किंवा अनुदानित
शाळेमध्ये नियमित आणि पूर्णवेळ शिक्षण घेणाऱ्या नववी आणि दहावीच्या विद्यार्थ्यांना मिळतो. निवड होणाऱ्या विद्यार्थ्यांना सात ते अकरा हजार रुपये  शिष्यवृत्ती मिळते. 

सर्व योजनांसाठी तहसीलदारांचा उत्पन्नाचा दाखला  आवश्यक आहे. तसेच नूतनीकरणासाठी प्रत्येक वर्षी विद्यार्थ्याने अर्ज भरणे आवश्यक आहे, असे पाटील यांनी नमूद केले.