दिवाळीसाठी सुकामेव्याला मागणी ; आवक वाढल्यामुळे सुकामेव्याच्या दरात १० ते २५ टक्क्यांपर्यंत घट

दिवाळीनिमित्त मिठाईची भेट दिली जाते. त्याबरोबरच सुकामेवा भेट देण्याचे प्रमाण वाढते आहे. अनेक खासगी कंपन्यांमधील कर्मचारी तसेच कार्यालयातील कर्मचाऱ्यांना सुकामेवा भेट दिला जातो. यंदा सुकामेव्याची आवक मोठय़ा प्रमाणावर होत असून गतवर्षीच्या तुलनेत यंदा सुकामेव्याच्या दरात किलोमागे १५ ते २५ टक्कयांपर्यंत घट झाली असल्याची माहिती मार्केटयार्ड भुसार बाजारातील सुकामेवा व्यापारी विनोद गोयल यांनी दिली.

फराळात सुकामेव्याचा वापर मोठय़ा प्रमाणावर केला जातो. त्यामुळे दिवाळीत सुकामेव्याच्या मागणीत मोठी वाढ होते. बाजारात काजू, बदाम, पिस्ता, बेदाणे तसेच अन्य सुकामेव्याची दररोज दोन ट्रक एवढी आवक होत आहे. गोवा, बेळगावमधून काजू, सांगली, तासगाव, विजापूर, पंढरपूर परिसरातून बेदाणे, पाकिस्तान, अफगाणिस्तानमधून जर्दाळू आणि सुके अंजीर, अमेरिकेतील कॅलेफोर्निया, ऑस्ट्रेलियातून बदाम, इराणमधून पिस्ता, मध्यप्रदेश आणि ओदीशातून चारोळीची आवक होत आहे. सुकामेव्याची आवक वाढली असल्याने यंदा सुकामेवा स्वस्त झाला असल्याचे गोयल यांनी सांगितले.

सुकामेव्याचे एक किलोचे दर

सुकामेवा प्रकार              २०२०            २०२१

बदाम               ८०० ते ८५० रुपये            ६२० रुपये

खारा पिस्ता           ९५० ते ११०० रुपये      ८५० रुपये

अक्रोड               ७०० ते १००० रुपये       ७०० ते १००० रुपये

काजू                ७०० ते ११०० रुपये      ६७० ते ९०० रुपये

अंजीर               ९०० ते १४०० रुपये      ७०० ते १००० रुपये

जर्दाळू             ३०० ते ५०० रुपये       ३०० ते ५०० रुपये

मनुके               २०० ते ३०० रुपये        २०० ते ३०० रुपये