“स्थानिक नेत्यांनी आरोपीला मदत केली, पण आम्ही…”, पुण्यातील वानवडी येथील अत्याचार प्रकरणात देवेंद्र फडणवीसांचे मोठे विधान

देवेंद्र फडणवीस म्हणाले की, पोलिसांच्या प्राथमिक चौकशीत असे लक्षात आले आहे की, स्थानिक काही नेत्यांनी त्याला पळून जाण्यात मदत केलेली आहे. अशा प्रकारच्या घटनांमध्ये मी काही राजकीय पक्ष वैगरे बघत नाही. आरोपी हा आरोपीच असतो. अशा आरोपीवर कडक कारवाई केली जाईल. तसेच आरोपीला मदत करणाऱ्यांवरही कारवाईचा बडगा उगारण्यात येईल, अशीही माहिती देवेंद्र फडणवीस यांनी दिली.

हे वाचा >> पुणे: विद्यार्थी वाहतूक करणाऱ्या चालकाकडून शाळकरी मुलीवर अत्याचार, वानवडी पोलिसांकडून गाडीचालक अटकेत

या घटनेत आणखी काही पीडित मुली आहेत का? याचाही तपास केला जात आहे. या घटनेची माहिती देताना देवेंद्र फडणवीस म्हणाले की, शाळेच्या व्हॅनमध्ये चालकाने मुलींना चुकीच्या पद्धतीने हात लावला. एका मुलीच्या पालकांना हा प्रकार समजल्यानंतर त्यांनी तक्रार दाखल केली. त्यानंतर आणखी एका मुलीला त्याने अशाच प्रकारे हात लावल्याचे समोर आले आहे. म्हणून त्याच्यावर पोक्सोअंतर्गत गुन्हा दाखल करण्यात आला आहे. संस्थाचालकांनाही याप्रकरणी चौकशीसाठी बोलाविण्यात आले आहे.

या माध्यमातून सर्व संस्था चालकांना आम्ही निर्देश देत आहोत की, त्यांनी त्यांच्या त्यांच्या शाळेतील वाहतूक व्यवस्थेवर अधिक लक्ष द्यावे. चालक आणि इतर कर्मचारी यांची चौकशी करून त्यांच्याबाबत योग्य माहिती ठेवावी, असेही ते म्हणाले.

पुणे पोलिसांनी संजय जेटींग रेड्डी (वय ४५, रा. वैदुवाडी, हडपसर) नावाच्या आरोपीला अटक केली असून त्याच्याविरुद्ध बालकांचे लैंगिक अत्याचारांपासून संरक्षण कायद्यान्वये (पोक्सो) गुन्हा दाखल केला आहे. पीडीत मुलगी चार दिवसांपूर्वी शाळेतून घरी आली तेव्हा तिने वडिलांकडे तक्रार केली. वडिलांनी विश्वासात घेऊन मुलीकडे चौकशी केली. तेव्हा विद्यार्थी वाहतूक करणारे संजय अंकल यांनी अश्लील कृत्य केल्याची माहिती दिली. संजय अंकल माझ्याबरोबर असणाऱ्या मैत्रिणीबरोबर अश्लील कृत्य करतात, अशी माहिती तिने वडिलांना दिली.

हे वाचा >> Veer Savarkar : “वीर सावरकर ब्राह्मण होते तरीही गोमांस खायचे, त्यांनी..” काँग्रेस नेत्याच्या वक्तव्यामुळे नवा वाद

काँग्रेसकडून सावरकरांचा वारंवार अपमान

कर्नाटक सरकारमधील मंत्री दिनेश गुंडूराव यांनी वीर सावरकर यांच्याबाबत वादग्रस्त विधान केलेले आहे. या विधानाबाबत पत्रकारांनी देवेंद्र फडणवीस यांना प्रश्न विचारला असता ते म्हणाले, “काँग्रेसकडून वारंवार वीर सावरकर यांचा अपमान केला जात आहे. गायीवर वीर सावरकरयांनी त्यांचे विचार मांडले आहेत. शेतकऱ्याला गाय ही कायमच कशी महत्त्वाची असते. त्यामुळे तिला मातेचा दर्जा दिला आहे, हे वीर सावरकर यांनी सांगितले. पण वीर सावरकर यांच्याबाबत राहुल गांधींनी चुकीची वक्तव्ये केली. काँग्रेसचे नेते हीच परंपरा पुढे नेताना दिसत आहेत.”