धायरीत टोळक्याची दहशत, तरुणाला जीवे मारण्याची धमकी

पुणे : सिंहगड रस्त्यावरील धायरी भागात टोळक्याने तरुणाला मारहाण करुन जीवे मारण्याची धमकी दिल्याची घटना घडली. या प्रकरणी सिंहगड रस्ता पोलिसांनी सहा जणांच्या विरुद्ध गुन्हा दाखल करण्यात आला. भूषण मोहिते (वय २०, रा. धायरी) असे जखमी झालेल्याचे नाव आहे. याबाबत मोहिते याने सिंहगड रस्ता पोलीस ठाण्यात फिर्याद दिली आहे. भूषण मोहिते आणि त्याचा मित्र धायरीतील गणपती मंदिर परिसरात गप्पा मारत थांबले होते. त्या वेळी आरोपी अभिषेक हजारे, समर्थ माने, कुणाल गायकवाड, अंकुश लोखंडे आणि साथीदार तेथे आले. भूषण आणि त्याच्या मित्राला आरोपींनी कुऱ्हाडीचा धाक दाखविला. या भागात परत दिसायचे नाही, असे सांगून आरोपींनी त्याला मारहाण केली. सहायक पोलीस निरीक्षक भरत चंदनशिव तपास करत आहेत.