पुणे : मराठा आरक्षणाच्या मागणीसाठी मनोज जरांगे पाटील हे पुन्हा एकदा उपोषणाला बसले आहेत. तर मराठा आरक्षणाची मागणी मान्य होत नाही. तोपर्यंत राज्यातील अनेक गावांमध्ये मराठा क्रांती मोर्चाच्या समन्वयकानी राजकीय नेत्यांना बंदी घातली आहे. त्याचे पडसाद अनेक ठिकाणी उमटण्यास सुरुवात झाली आहे. त्या सर्व घडामोडी दरम्यान पुण्यात राष्ट्रवादी काँग्रेस पक्षाचे नेते मंत्री धनंजय मुंडे यांचा मेळावा आयोजित करण्यात आला होता. मात्र सध्याची परिस्थिती लक्षात घेऊन धनंजय मुंडे यांनी मेळाव्याला येण्याचं टाळलं.
राष्ट्रवादी काँग्रेस पक्षाचे पुणे शहराध्यक्ष दीपक मानकर यांनी शुक्रवार पेठेतील श्री शिवाजी मराठा हायस्कूलच्या मैदानावर युवकांचा मेळावा आयोजित केला होता. या मेळाव्याला राष्ट्रवादी काँग्रेस पक्षाचे नेते आणि मंत्री धनंजय मुंडे उपस्थित राहून कार्यकर्त्यांना नियुक्तीचे पत्र देणार होते. त्या पार्श्वभूमीवर जोरदार तयारी करण्यात आली होती.
आणखी वाचा-रोहित पवार यांची युवा संघर्ष यात्रा तात्पुरती स्थगित, मराठा आरक्षणाला पाठिंबा देण्यासाठी निर्णय
या कार्यक्रमाच्या ठिकाणी सायंकाळी सहा वाजल्यापासून कार्यकर्त्यांनी जमण्यास सुरुवात केली होती. तर या कार्यक्रमाच्या ठिकाणी मराठा क्रांती मोर्चाचे समन्वयक तुषार काकडे हे नागरिकांमध्ये जाऊन बसल्याचे कार्यकर्त्यांना दिसले. राज्यातील अनेक भागात मराठा क्रांती मोर्चाचे समन्वयक खासदार, आमदार आणि मंत्र्यांच्या कार्यक्रमांना विरोध दर्शवित आहेत. त्यामुळे आयोजकांनी तुषार काकडे यांना बाहेर जाण्यास सांगितले.
यावेळी प्रसार माध्यमांशी संवाद साधताना तुषार काकडे म्हणाले की, मराठा आरक्षणाच्या मागणीसाठी मनोज जरांगे पाटील यांनी राज्य सरकारला ४० दिवसांची मुदत दिली होती. मात्र कोणत्याही प्रकारचा निर्णय राज्य सरकारला घेता आला नाही. त्यामुळे राज्यातील मराठा समाज अधिक आक्रमक झाला असून ठिकठिकाणी साखळी उपोषण, आंदोलन करण्यात येत आहे. अनेक गावामध्ये मंत्र्यांना बंदी घालण्यात आली आहे. तर त्याच दरम्यान आज पुण्यात धनंजय मुंडे हे कार्यक्रमासाठी येणार आहेत. त्याबाबत माहिती मिळाली. त्यामुळे मी या ठिकाणी आलो. पण आयोजक आणि पोलिसांना वाटले की, मी येथे काही करेल, त्यामुळे मला बाहेर काढले आहे. मात्र आम्ही जोवर आरक्षणाचा प्रश्न मार्गी लागत नाही. तोपर्यंत कोणत्याही पक्षाचा नेता असो की मंत्री आम्ही त्यांचा निषेध करणार, आता कोणालाही सुट्टी नाही. असा इशारा यावेळी त्यांनी दिला.
