लोकसत्ता प्रतिनिधी
पुणे : अमली पदार्थ तस्कर ललित पाटील प्रकरणात ससून रूग्णालयातील वैद्यकीय अधिकारी डॉ. प्रवीण देवकाते यांना गुन्हे शाखेने अटक केली. ललितला उपचारासाठी दाखल करण्याची शिफारस केल्याप्रकरणी येरवडा कारागृहातील डॉ. संजय मरसाळे यांना गुन्हे शाखेने सोमवारी अटक करण्यात आली होती. त्यानंतर ससून रुग्णालयातील डॉ. देवकाते यांना अटक करण्यात आल्यानंतर खळबळ उडाली आहे. देवकाते यांनी ससूनमध्ये उपचारासाठी दाखल झालेल्या ललितला मदत केल्याचे तपासात उघडकीस आले आहे.
याप्रकरणी ससून रूग्णालयातील वैद्यकीय अधिकारी डॉ. प्रवीण दादासाहेब देवकाते (वय ४०) यांच्याविरुद्ध बंडगार्डन पोलीस ठाण्यात गुन्हा दाखल करण्यात आला आहे. डॉ. देवकाते यांना सोमवारी रात्री उशीरा अटक करण्यात आली. चाकण येथे मेफेड्रोन बाळगल्याप्रकरणी ललित पाटीलला अटक करण्यात आली होती. येरवडा कारागृहात तो न्यायालयीन कोठडीत होता. आजारी असल्याचा बहाणा करुन ललित ससून रुग्णालयात उपचारासाठी दाखल झाला होता. ललित ससूनमध्ये उपचार घेत असताना ललित, साथीदार अरविंदकुमार लोहरे, त्याचा भाऊ भूषण, अभिषेक बलकवडे यांनी नाशिक परिसरातील शिंदे गावात मेफेड्रोनची निर्मिती करण्यासाठी कारखाना सुरू केला होता.
ससून रूग्णालयातून ललित मेफेड्रोनची विक्री करत असल्याची माहिती मिळाल्यानंतर २९ सप्टेंबर रोजी ससून परिसरात कारवाई करुन ललितच्या दोन साथीदारांना पकडले होते. त्यांच्याकडून दोन कोटी रुपयांचे मेफेड्रोन जप्त करण्यात आले होते. या प्रकरणी बंडगार्डन पोलीस ठाण्यात गुन्हा दाखल झाल्यानंतर ललित २ ऑक्टोबर रोजी ससूनमधील कैद्यांच्या उपचार कक्षात (वॉर्ड क्रमांक १६) बंदोबस्तास असलेल्या पोलिसांना गुंगारा देऊन पसार झाला होता.
याप्रकरणाची सखोल चौकशी करण्याची मागणी काँग्रेसचे आमदार रवींद्र धंगेकर यांनी केली होती. त्यानंतर ससूनमधील कर्मचारी महेंद्र शेवते, येरवडा कारागृहातील समुपदेशकाला अटक करण्यात आली. तपासात डॉ. मरसाळे यांनी ललितला ससून रुग्णलायात उपचारासाठी दाखल करण्याचे पत्र दिल्याचे निष्पन्न झाले. डॉ. मरसाळे यांनी ललितकडून पैसे घेतल्याचे उघडकीस आल्यानंतर त्यांना सोमवारी अटक करण्यात आली.
आणखी वाचा-पुण्यातील रिंगरोडच्या भूसंपादनात नवा ट्विस्ट; पाच गावे प्रकल्पातून वगळली
कारागृह रक्षक निलंबित
ललित पाटील प्रकरणात बंदोबस्तात हलगर्जी केल्याचा ठपका ठेवून दहा पोलीस कर्मचाऱ्यांना निलंबित करण्यता आले आहे. पाटीलला पसार होण्यास मदत केल्याप्रकरणी दोन पोलिसांना अटक करण्यात आली. कारागृह रक्षक मोईस शेख याला सेवेतून निलंबित करण्याचे आदेश कारागृह महानिरीक्षक अमिताभ गुप्ता यांनी याबाबतचे दिले. कारागृह रक्षक मोईस अहमद शेख (वय ३०, रा. मूळ रा. देगलूर, नांदेड), येरवडा कारागृहातील समुपदेशक सुधाकर सखाराम इंगळे (वय ४४) यांना गेल्या आठवड्यात अटक करण्यात आली. पाटील आणि त्याच्या साथीदारांच्या संपर्कात राहून शेख याने ससून रूग्णालयातून पसार होण्यासाठी मदत केल्याचे पोलीस तपासात निष्पन्न झाले आहे.
