लोकसत्ता प्रतिनिधी
पुणे: शालेय शिक्षण विभागाकडून राज्यात शिक्षक भरतीची प्रक्रिया सुरू करण्यात आली आहे. त्यात पवित्र संकेतस्थळावर सुरू असलेल्या नोंदणी, पात्र उमेदवारांना स्व-प्रमाणपत्र भरण्यासाठी २२ सप्टेंबरपर्यंत मुदतवाढ देण्यात आली असून, अद्याप स्व-प्रमाणपत्र प्रक्रिया पूर्ण न केलेल्या उमेदवारांना दिलासा मिळाला आहे.
शिक्षण आयुक्त सूरज मांढरे यांनी दिलेल्या माहितीनुसार, शिक्षक पदभरतीसाठी शासनाने शिक्षक अभियोग्यता आणि बुद्धिमत्ता चाचणी २०२२ ही परीक्षा घेण्यात आली होती. या चाचणीस २ लाख ३९ हजार ७३० उमेदवारांनी नोंदणी केली होती, त्यापैकी २ लाख १६ हजार ४४३ उमेदवारांनी प्रत्यक्ष चाचणी दिली. चाचणी दिलेल्या उमेदवारांना १ ते १५ सप्टेंबर या कालावधीमध्ये पवित्र संकेतस्थळावर स्व-प्रमाणपत्र पूर्ण करण्यासाठी सुविधा दिलेली आहे.
हेही वाचा… चिंचवड येथील मंगलमूर्तींची भाद्रपद यात्रा शनिवारपासून
मात्र या मुदतीत पात्र उमेदवारांपैकी केवळ ५० टक्के उमेदवारांनी स्व-प्रमाणपत्र भरून प्रमाणित केलेले नाही. तसेच राज्यातील काही भागामध्ये इंटरनेट सुविधा व्यवस्थितरित्या सुरू नसल्याने अडचणी येत आहेत. १४ सप्टेंबर रोजी संकेतस्थळावर स्व-प्रमाणपत्र पूर्ण झालेल्या उमेदवारांची संख्या विचारात घेता दिलेल्या ही प्रक्रिया मुदतीत पूर्ण होणार नाही. ही बाब विचारात घेता स्व-प्रमाणपत्र पूर्ण करण्यासाठी २२ सप्टेंबरपर्यंत मुदतवाढ देण्याचा निर्णय घेण्यात आला.
हेही वाचा… पिंपरी-चिंचवड शहर खड्डेमुक्त करण्यासाठी महापालिकेने उचलले ‘हे’ पाऊल
स्व-प्रमाणपत्र पूर्ण न करणारे उमेदवार नव्याने होणाऱ्या शिक्षक पदभरतीच्या पुढील प्रक्रियेसाठी पात्र ठरणार नाहीत. प्रमाणीकरण करताना किंवा संकेतस्थळाबाबत शंका, अडचणी येत असल्यास edupavitra2022@gmail.com या ईमेल पत्त्यावर अर्ज पाठवावा. त्यास उत्तर देण्यात येईल कोणत्याही कर्मचारी अधिकारी अथवा त्रयस्थ व्यक्तीस संपर्क न करण्याबाबत शिक्षण विभागाकडून स्पष्ट करण्यात आले.
पवित्र पोर्टलवरील नोंदणी
नोंदणी केलेले उमेदवार – १ लाख २६ हजार ४५३
अपूर्ण- १६ हजार २३५
प्रमाणित न केलेले- १५ हजार २७०
प्रमाणित केलेले- ९४ हजार ९४८
