लोकसत्ता प्रतिनिधी
पुणे : बेकायदा गावठी दारु वाहतूक करणाऱ्या टेम्पोवर कारवाई करणाऱ्या उत्पादन शुल्क विभागातील (स्टेट एक्साईज) दुय्यम निरीक्षकालाच्या दुचाकीला मोटारीची धडक देण्यात आली. कारवाई केलेला टेम्पो घेऊन आरोपी पसार झाल्याची घटना नगर रस्त्यावरील भावडी गावात घडली. याप्रकरणी वाघोली पोलिसांनी दोघांविरुद्ध गुन्हा दाखल करण्यात आला.
याबाबत उत्पादन शुल्क विभागातील दुय्यम निरीक्षक विशाल कदम (वय ३०) यांनी वाघोली पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, दोघांविरुद्ध गु्न्हा दाखल करण्यात आला आहे. पोलिसांनी दिलेल्या माहितीनुसार, उत्पादन शुल्क विभागातील दुय्यम निरीक्षक विशाल कदम नगर रस्ता भागातील भावडी गावात कारवाईसाठी गेले होते. त्या वेळी टेम्पोतून गावठी दारुची वाहतूक होत असल्याची माहिती त्यांना मिळाली.
आणखी वाचा-थिरकणाऱ्या व्हीलचेअर्स, रसिकांच्या टाळ्यांचा निनाद आणि…
भावडी गावातील रस्त्यावर त्यांनी टेम्पो अडविला. पाठीमागून येणाऱ्या एका मोटारीने दुचाकीस्वार कदम यांना धडक दिली. दुचाकीस्वार कदम रस्त्यात पडले. कारवाई केलेला टेम्पो घेऊन चालक पसार झाला. अंधारात मोटारचालकही पसार झाला. पोलीस उपनिरीक्षक वैजनाथ केदार तपास करत आहेत.
