माथाडी संघटनेच्या नावाखाली दोन लाख ९० हजारांची खंडणी उकळणाऱ्या एकाला खंडणी विरोधी पथकाने अटक केली. खडकी रेल्वे स्थानकातील मालधक्का परिसरात ही कारवाई करण्यात आली.
हेही वाचा >>>पुणे : फेरफार अदालतीचे उद्या आयोजन ; प्रलंबित नोंदी निकाली काढण्याचे आवाहन
पप्पू भिवा खरात (वय ३६, रा. ओैंध) असे अटक करण्यात आलेल्याचे नाव आहे. याबाबत चाकण येथील एका खासगी कंपनीतील अधिकाऱ्याने फिर्याद दिली आहे. तक्रारदार एका लाॅजिस्टिक कंपनीत अधिकारी आहेत. संबंधित कंपनीकडून रेल्वेने आलेल्या मालाची वाहतूक केली जाते. खडकीतील मालधक्का परिसरातील रेल्वेने आलेल्या मालाची पोहोच संंबंधित कंपनीकडून केली जाते.
हेही वाचा >>>पुणे : सराफ बाजारात महिलेकडील सात लाखांचे दागिने चोरले
खरात याने माथाडी संघटनेच्या नावाखाली कंपनीतील अधिकाऱ्याला धमकावले. मालाची वाहतूक आमच्या संघटनेकडून करण्यात येईल, असे सांगून खरातने त्यांच्याकडून एक लाख ९० हजार रुपये खंडणी उकळली. त्यानंतर खरातने पुन्हा कामात अडथळा आणून एक लाख रुपयांची मागणी केली. पैसे न दिल्यास जातीवाचक शिवीगाळ केल्या प्रकरणी गुन्हा दाखल करण्याची धमकी त्यांना देण्यात आली. त्यानंतर त्याला एक लाख रुपये दिले. पैसे दिल्यानंतरही खरातकडून धमकावण्यात येत होते. संबंधित अधिकाऱ्याने याबाबत पोलिसांकडे तक्रार दिली. खरातला सापळा लावून पकडण्यात आले. खडकी पोलीस ठाण्यातील पोलीस उपनिरीक्षक अर्जुन बोमदंडी तपास करत आहेत.
