पिंपरी : पिंपरी-चिंचवड शहरात डोळे येण्याची साथ नियंत्रणात आली आहे. ऑगस्टपासून डोळे येण्याच्या प्रमाणात घट झाली. मात्र, साथीच्या आजारांनी शहरवासीय हैराण झाले आहेत. सर्दी-खोकला, तापाच्या रुग्णांमध्ये वाढ झाली आहे. जुलैमध्ये आळंदी येथून सुरू झालेल्या डोळे येण्याच्या साथीचा ऑगस्टमध्ये शहरात वेगाने प्रसार झाला. प्रादुर्भाव होण्याचे प्रमाण शालेय विद्यार्थ्यांमध्ये सर्वाधिक होते. विद्यार्थ्यांमध्ये संसर्गाचा प्रसार होऊ नये यासाठी शाळांमध्येही तपासणी केली जात होती, मात्र लहान मुलांमध्ये असणाऱ्या संसर्गाचा प्रसार मोठ्यांमध्येही झाल्याने ऑगस्टमध्ये डोळे आलेल्या रुग्णांच्या संख्येने उच्चांक गाठला होता.
ऑगस्टच्या तुलनेत या महिन्यात नागरिकांमध्ये डोळे येण्याचे प्रमाण घटले आहे. आतापर्यंत ९६ रुग्णांची नोंद झाली आहे. या उलट गेल्या महिन्यात हे प्रमाण पाच हजारांच्या आसपास होते. यामुळे डोळे येण्याची साथ आटोक्यात आली असल्याचे दिसत आहे. एकीकडे डोळे येण्याची साथ आटोक्यात आली असली तरी दुसरीकडे साथीच्या आजारांनी शहरवासीय हैराण झाले आहेत. साथीच्या रुग्णांमध्ये मोठ्या प्रमाणात वाढ होत आहे. सर्दी, ताप, खोकल्याने नागरिक हैराण झाले आहेत. बदलेल्या वातावरणामुळे हे प्रमाण वाढत असून सर्व वयोगटांमध्ये सर्दी खोकल्याबरोबरच तापाचे रुग्ण आढळून येत आहेत.
हेही वाचा : पिंपरीत क्षेत्रीय कार्यालयांतर्गत गणेशमूर्ती संकलन केंद्र
‘शहरात डोळे येण्याची साथ आटोक्यात आली आहे. प्रादुर्भावाचे प्रमाण कमी झाली आहे. वातावरणातील बदलामुळे साथीच्या रुग्णांमध्ये वाढ होताना दिसत आहे. त्यामुळे पाणी उकळून थंड करून प्यावे. तेलकट, थंड पदार्थांचे सेवन टाळावे. संतुलित आहार घ्यावा’, असे आवाहन पिंपरी चिंचवड महापालिकेचे आरोग्य वैद्यकीय अधिकारी डॉ. लक्ष्मण गोफणे यांनी शहरवासीयांना केले आहे.