पुणे : पाळीव जनावरांसाठी मुरघास तयार करण्यासाठी सासवड परिसरातील वनविभागाच्या जागेत खोदलेल्या खड्डयाप्रकरणी कारवाई न करण्यासाठी शेतकऱ्याकडून एक लाख रुपयांची लाच घेणाऱ्या वनरक्षकाला लाचलुचपत प्रतिबंधक विभागाने (एसीबी) अटक केली. गोविंद रामेश्वर निर्डे (वय ३२) असे अटक करण्यात आलेल्या वनरक्षकाचे नाव आहे. याबाबत एका शेतकरी तरुणाने सासवड पोलीस ठाण्यात फिर्याद दिली आहे. याप्रकरणी निर्डे याच्याविरुद्ध भ्रष्टाचार प्रतिबंध अधिनियमान्वये गुन्हा दाखल करण्यात आला आहे.
लाचलुचपत प्रतिबंधक विभागाच्या अधिकाऱ्यांनी दिलेल्या माहितीनुसार, सासवड वनविभागाच्या वनपरिक्षेत्र कार्यालयात गोविंद निर्डे वनरक्षक आहे. तक्रारदार तरुणाने पाळीव जनावरांसाठी मुरघास तयार करण्यासाठी वनविभागाच्या जागेत खड्डा खोदला होता. वनविभागातील अधिकाऱ्यांच्या निदर्शनास हा प्रकार आल्यानंतर तक्रारदाराने खड्डा बुजविला. त्यानंतर वनरक्षक निर्डे याने याप्रकरणात वन अधिनियमानुसार गुन्हा दाखल करण्यात येणार आहे. कारवाई न करण्यासाठी दोन लाख रुपयांची लाच निर्डे याने तक्रारदाराला मागितले.
त्यानंतर तक्रारदाराने तडजोडीत एक लाख रुपये देण्याचे मान्य करुन लाचलुचपत प्रतिबंधक विभागाकडे तक्रार दिली. या तक्रारीची पडताळणी करण्यात आली. तक्रारीत तथ्य आढल्यानंतर सासवडमधील वीर फाटा परिसरात सापळा लावण्यात आला. निर्डे याने तक्रारदाराला एक लाख रुपये घेऊन शुक्रवारी दुपारी बोलाविले. त्यानंतर तक्रारदार तरुणाकडून एक लाख रुपयांची लाच घेताना निर्डे याला पकडण्यात आले. पोलीस अधीक्षक शिरीष सरदेशपांडे, अतिरिक्त अधीक्षक विजय चौधरी यांच्या मार्गदर्शनाखाली पोलीस उपअधीक्षक दयानंद गावडे, उपअधीक्षक भारती माेरे यांनी ही कारवाई केली.