पुणे : महाराष्ट्र औद्योगिक महामंडळातर्फे (एमआयडीसी) २०१९ मध्ये जाहीर करण्यात आलेली सरळसेवा भरती प्रक्रिया करोना प्रादुर्भावासह विविध कारणांनी रखडली होती. मात्र आता चार वर्षांनी ही पदभरती रद्द केल्याचे जाहीर करण्यात आले असून या परीक्षेसाठी उमेदवारांकडून घेण्यात आलेले ५०० रुपये परीक्षा शुल्क परत देण्याबाबत स्पष्टता देण्यात आलेली नाही.
भरती प्रक्रिया रद्द करण्यात आल्याचे परिपत्रक एमआयडीसीने संकेतस्थळावर प्रसिद्ध केले. सरळसेवा भरती २०१९ अंतर्गत गट क आणि गट ड मधील एकूण १४ संवर्गातील पदांच्या भरतीसाठी जाहिरात प्रसिद्ध करण्यात आली होती. त्यातील ५०२ पदे ही ऑनलाइन परीक्षेद्वारे तर ३६३ पदे ऑफलाइन परीक्षेद्वारे भरली जाणार होती. ५०२ पदांसाठी २० ऑगस्ट २०२१ ते २७ ऑगस्ट २०२१ या कालावधीमध्ये ऑनलाइन परीक्षा घेऊन १५ डिसेंबर २०२१ रोजी निकाल जाहीर करण्यात आला. त्यातील लघुलेखक संवर्गासाठी निवड झालेल्या उमेदवारांची यादी ३० डिसेंबर २०२१ रोजी प्रसिद्ध करण्यात आली होती.
हेही वाचा : महत्त्वाची बातमी : पुणे-मुंबई दरम्यानच्या अनेक गाड्या उद्या रद्द
मात्र, त्यानंतर आवश्यक असलेली व्यावसायिक परीक्षा होऊ शकली नाही. अखेरीस ही परीक्षा प्रक्रियाच रद्द करण्यात येत असल्याचे एमआयडीसीने परिपत्रकाद्वारे जाहीर केले. वाहनचालक, शिपाई, मदतनीस, अग्निशमन विमोचक, यंत्रचालक, चालक (अग्निशमन), वीजतंत्री ग्रेड २, मदतनीस अशा पदांची भरती रद्द करण्यात आल्याचे नमूद करण्यात आले आहे.
हेही वाचा : फेसबुकवरील मैत्रिणीला भेटायला हॉटेलवर गेला अन् जाळ्यात अडकला; पुण्यातील व्यावसायिकाबरोबर घडला विचित्र प्रकार
भरती प्रक्रिया रद्द करण्यामागे आकृतीबंध अंतिम नाही, महापरीक्षा संकेतस्थळाचा शासन निर्णय अधिक्रमित होणे, परीक्षा घेण्यासाठीच्या कंपन्यांचे पॅनेल स्थगित होणे अशी कारणे देण्यात आली आहेत. मात्र भरती प्रक्रिया रद्द करताना उमेदवारांनी परीक्षांसाठी भरलेल्या शुल्काच्या परताव्याबाबत परिपत्रकात स्पष्टता देण्यात आलेली नाही. उमेदवारांनी प्रत्येकी पाचशे रुपये परीक्षा शुल्क भरले होते. त्यामुळे चार वर्षे प्रतीक्षा करून पदभरती रद्द आणि शुल्क परताव्याचीही स्पष्टता नाही, अशी उमेदवारांची कोंडी झाली आहे.
