लोकसत्ता प्रतिनिधी
पुणे : आभासी चलनात गुंतवणुकीच्या आमिषाने शहरातील एका प्रसिद्ध वैद्यकीय तज्ज्ञासह मित्राची दीड कोटी रुपयांची फसवणूक करण्यात आल्याचा प्रकार उघडकीस आला आहे. याप्रकरणी जयपूरमधील एका डॉक्टरविरुद्ध चतु:शृंगी पोलिसांनी गुन्हा दाखल केला. जयपूरमधील डॉक्टरने आभासी चलनात गुंतवणुकीच्या आमिषाने अनेकांची फसवणूक केल्याची माहिती प्राथमिक चौकशीत मिळाली आहे. त्यादृष्टीने तपास करण्यात येत आहे.
याबाबत एका डॉक्टरने चतु:शृंगी पोलीस ठाण्यात फिर्याद दिली आहे. तक्रारदार प्रसिद्ध त्वचाविकार तज्ज्ञ आहेत. त्यांनी दिलेल्या फिर्यादीनुसार, जयपूरमधील एका डॉक्टरविरुद्ध गुन्हा दाखल करण्यात आला आहे, अशी माहिती चतु:शृंगी पोलिसांनी दिली. पोलिसांनी दिलेल्या माहितीनुसार, तक्रारदार डॉक्टरची आरोपी डॉक्टरशी एका परिचिताार्फत २०१९ मध्ये जयपूरमध्ये ओळख झाली होती. करोना संसर्ग काळात आरोपी डॉक्टरच्या नात्यातील एकाला करोना संसर्ग झाला होता. त्या वेळी पुण्यातील डॉक्टरांनी आरोपी डॉक्टरच्या परिचिताला मदत केली होती. ओळखीतून त्यांची आरोपीशी मैत्री झाली. डॉ. नागरने त्यांना आभासी चलनात दहा लाख रुपये गुंतविण्यास सांगितले. गुंतवणुकीवर चांगला परतावा मिळेल, असे आमिष त्यांना दाखविण्यात आले होते.
त्यानंतर तक्रारदार डॉक्टरच्या मित्राने एक कोटी ४९ लाख रुपयांची रक्कम त्याला गुंतविण्यास दिली. रक्कम गुंतविण्यात आल्यानंतर त्यांना परतावा देण्यात आला नाही. त्यानंतर त्यांनी त्याच्याकडे पैसे परत मागितले. तेव्हा त्याने पैसे देण्यास नकार दिला, तसेच जिवे मारण्याची धमकी दिली, असे तक्रारदार डॉक्टरांनी दिलेल्या फिर्यादीत म्हटले आहे. त्यांनी पोलिसांकडे तक्रार दिली. चौकशीत आरोपी डॉक्टरने अनेकांची फसवणूक केल्याची माहिती चौकशीत मिळाली. त्याने आणखी किती जणांची फसवणूक केली. यादृष्टीने तपास करण्यात येत आहे.
