पिंपरी- चिंचवड : पिंपरी- चिंचवडच्या सायबर पोलिसांनी ज्येष्ठ नागरिकाची फसवणूक करणाऱ्या आंतरराष्ट्रीय टोळीच्या संपर्कात असणाऱ्या गुन्हेगाराला बेड्या ठोकल्या आहेत. जेष्ठ नागरिकाची दोन कोटी ५२ लाख ९६ हजार रुपयांची ऑनलाइन फसवणूक केली होती.
शेअर मार्केटमध्ये पैसे गुंतवून चांगला परतावा मिळून देण्याच्या आमिषाने फसवणूक केल्याची माहिती सायबर पोलिसांनी दिली आहे. आरोपी बाळासाहेब सखाराम चौरे हा बीड जिल्ह्यातील केज येथील राहणारा असून त्याचं थेट दुबईत राहणाऱ्या पाकिस्तानी नागरिकासोबत कनेक्शन असल्याचं तपासात समोर आल आहे.
सायबर पोलिसांनी दिलेल्या माहितीनुसार, आरोपीने फेसबुकच्या माध्यमातून ज्येष्ठ नागरिक यांना जाळ्यात ओढलं. ऑनलाइन ट्रेंडिंग संदर्भात लिंक पाठवून व्हाट्सअप ग्रुप मध्ये ऍड केलं. एच.एस.बी.सी ट्रेंडिंग नावाचं ॲप मोबाईल मध्ये डाऊनलोड करण्यास सांगितलं. अपद्वारे शेअर मार्केट आणि स्टॉक मार्केटमध्ये गुंतवणूक केल्यास चांगला परतावा मिळू शकतो असं अमिश दाखवलं. पैसे भरण्यास त्यांना भाग पाडलं.
परंतु, गुंतवलेले पैसे परत मिळवण्यासाठी ब्रोकरेज फी, हाय ट्रान्झॅक्शन्स फी, सिक्युरिटी डिपॉझिट, थर्ड पार्टी ट्रांजेक्शन विड्रॉल प्लॅटफॉर्म असे वेगवेगळे चार्जेस भरण्यास भाग पाडून आत्तापर्यंत दोन कोटी ५२ लाख ९६ हजार रुपयांची फसवणूक केली. पैसे परतच मिळत नसल्याने अखेर याप्रकरणी ज्येष्ठ नागरिकांनी पिंपरी- चिंचवडच्या सायबर पोलिसांकडे धाव घेतली. प्रकरणाबाबत रीतसर तक्रार नोंदवण्यात आली.
कोट्यावधी रुपयांच प्रकरण असल्याने सायबर पोलिसांनी तात्काळ दखल घेतली आणि पोलीस आयुक्त विनयकुमार चौबे यांच्या मार्गदर्शनाखाली तपासाला सुरुवात केली. सहाय्यक पोलीस निरीक्षक प्रवीण स्वामी, सागर पोमन, वैभव पाटील, विद्या पाटील यांची पथक तयार करण्यात आली. वापरण्यात आलेले बँक खात्याचा तपास करण्यात आला. हे बँक खातं बीड जिल्ह्यातील असल्याचे तांत्रिक तपासात निष्पन्न झालं. बँक खाते धारकाला सायबर पोलिसांनी ताब्यात घेतलं. त्याच्याकडे अधिक तपास केल्यानंतर संबंधित खातं वापरत असलेल्या आरोपी बाळासाहेब सखाराम चौरे ला केज तालुक्यातील जीवाची वाडी येथून अटक करण्यात आली.
आरोपीच दुबई कनेक्शन समोर आलं आहे. तेथे राहत असलेल्या गणेश काळे आणि पाकिस्तानी नागरिकाशी संगणमत करून बँक खाते त्यांना कमिशनच्या आधारावर देत असल्याचं पोलीस तपासात निष्पन्न झालं आहे. आरोपी बाळासाहेब सखाराम चौरे हा दुबई, नेपाळ च्या आंतरराष्ट्रीय टोळीच्या संपर्कात असल्याचं उघड झालं आहे. या प्रकरणी अधिक तपास पोलीस निरीक्षक रविकरण नाळे हे करत आहेत.
