‘गरवारे’ ठरले उत्कृष्ट महाविद्यालय!

पुणे विद्यापीठाचा उत्कृष्ट महाविद्यालय पुरस्कार अव्यावसायिक अभ्यासक्रमांमध्ये गरवारे वाणिज्य महाविद्यालयाला मिळाला आहे. व्यावसायिक महाविद्यालयांमध्ये या वर्षी कोणत्याही महाविद्यालयाला प्रथम क्रमांक मिळू शकलेला नाही. विद्यापीठाच्या वर्धापन दिन सोहळ्यामध्ये या पुरस्कारांचे वितरण करण्यात येणार आहे.
पुणे विद्यापीठाच्या वार्षिक पुरस्कारांची घोषणा कुलगुरू डॉ. वासुदेव गाडे यांनी शनिवारी पत्रकार परिषदेत केली. विद्यापीठाच्या वतीने दरवर्षी गुणवंत शिक्षक, शिक्षकेतर कर्मचारी, आदर्श महाविद्यालये यांना पुरस्कार देण्यात येतात. या वर्षी आदर्श राज्य शिक्षक पुरस्कार नाशिक येथील केटीएचएम महाविद्यालयातील शिक्षक डॉ. गोटन हिरालाल जैन यांना जाहीर झाला आहे. व्यावसायिक महाविद्यालयांमध्ये शहरी विभागामध्ये या वर्षी कोणत्याही महाविद्यालयाला प्रथम क्रमांक मिळालेला नाही. द्वितीय क्रमांक आकुर्डी येथील डी. वाय. पाटील महाविद्यालयाला मिळाला आहे. ग्रामीण विभागामध्ये प्रथम क्रमांक आळंदी येथील एम.आय.टी अभियांत्रिकी महाविद्यालयाला, तर द्वितीय क्रमांक भोर येथील निर्मलाताई थोपटे महाविद्यालयाला मिळाला आहे.
अव्यावसायिक अभ्यासक्रमांमध्ये शहरी विभागामध्ये गरवारे वाणिज्य महाविद्यालयाला प्रथम क्रमांक आणि हडपसर येथील अण्णासाहेब मगर महाविद्यालयाला द्वितीय क्रमांक मिळाला आहे. ग्रामीण विभागामध्ये प्रथम क्रमांक इंदापूर येथील इंदापूर तालुका शिक्षण प्रसारक मंडळाच्या कला, विज्ञान आणि वाणिज्य महाविद्यालयाला तर द्वितीय क्रमांक नगर येथील न्यू आर्ट्स, कॉमर्स, अँड सायन्स कॉलेजला मिळाला आहे.