लोकसत्ता प्रतिनिधी
पुणे: घराबाहेर खिडकीला दोरी आणि टॉवेल बांधून झोका घेत असताना गळफास बसून सात वर्षांच्या बालिकेचा मृत्यू झाल्याची दुदैवी घटना कात्रज भागातील आंबेगाव परिसरात घडली. या घटनेनंतर या परिसरात शोककळा पसरली.
आदिती दत्तात्रय कुलकर्णी ( वय ७, रा. मल्हारीनगर, आंबेगाव, कात्रज) असे मृत्युमुखी पडलेल्या बालिकेचे नाव आहे. आदिती पाहिलीत शिकत होती. एकुलती एक मुलगी असलेली आदिती घराच्या खिडकीला बांधलेल्या झोका खेळत होती. तिची आजी घरात होती. आई आणि वडील दोघेही कामावर गेले होते. टॉवेल आणि दोरीने तिने झोका बांधला होता.
हेही वाचा… पुणे: मध्य रेल्वेकडून ‘पंढरपूर आषाढी एकादशी’ विशेष गाड्या
झोक्यावरून तिचा अचानक तोल गेला आणि त्याचा फास तिला बसला. तिच्या आजीने मदतीसाठी आरडाओरडा केल्यानंतर रहिवाशांनी तेथे धाव घेतली. त्यांनी फास सोडवला. तिला तातडीने रुग्णालयात दाखल करण्यात आले. उपचारांपूर्वीच तिचा मृत्यू झाला होता. भारती विद्यापीठ पोलीस ठाण्यात याप्रकरणी अकस्मात मृत्यू अशी नोंद करण्यात आली आहे.
