पुणे : सिंहगड रस्त्यावरील किरकटवाडी भागात एका उपाहारगृहात तोडफोड करून दहशत माजविणाऱ्या गुंडांची हवेली पोलिसांनी धिंड काढली.
सराईत गुंड वैभव इक्कर आणि साथीदार चेतन चोरघे (दोघे रा. कोल्हेवाडी, सिंहगड रस्ता) यांनी दोन दिवसांपूर्वी सिंहगड रस्त्यावरील एका उपाहारगृहात तोडफोड केली होती. या घटनेची माहिती मिळाल्यानंतर हवेली पोलीस ठाण्यातील पोलीस कर्मचाऱ्यांना दोघांनी शिवीगाळ केली होती. आरोपी वैभव इक्कर सराईत असून, त्याच्याविरुद्ध गंभीर गुन्हे दाखल झाले आहेत. हाॅटेलमध्ये तोडफोड करून दहशत माजविल्या प्रकरणी इक्कर आणि साथीदार चोरघे यांच्याविरुद्ध हवेली पोलीस ठाण्यात गुन्हा दाखल करण्यात आला आहे. त्यानंतर इक्कर आणि साथीदारांची दहशत मोडीत काढण्यासाठी हवेली पोलीस ठाण्यातील पोलीस अधिकारी अनमोल मित्तल यांनी कारवाईच्या सूचना दिल्या.
हेही वाचा – अजित पवारांच्या शपथविधीचा उल्लेख करत राज ठाकरेंचा हल्लाबोल; म्हणाले, “शरद पवारांचे…”
इक्कर आणि चोरघे यांना घेऊन पोलिसांच्या पथकाने सिंहगड रस्त्यावरील किरकटवाडी, कोल्हेवाडी भागातून धिंड काढली. यापूर्वी किरकटवाडी परिसरात गुंडांनी दहशत माजविल्याची घटना घडली होती. पोलिसांनी कारवाई केल्याने गुंडांना जरब बसेल. पोलिसांनी केलेली कारवाई योग्य आहे, असे नागरिकांनी सांगितले. पोलिसांनी केलेल्या कारवाईचे या भागातील नागरिकांनी कौतुक केले आहे.
