पुणे : पंतप्रधान नरेंद्र मोदी यांच्या दौऱ्यानिमित्त शहरातील मध्यभागाला छावणीचे स्वरूप प्राप्त झाले आहे. चौकाचौकांत पोलीस बंदोबस्त ठेवण्यात आला आहे. मध्यभागातील वाहतूक व्यवस्थेत मंगळवारी सकाळपासून वाहतूक बदल करण्यात आले आहे.
पंतप्रधानांचा ताफा ज्या मार्गावरून जाणार आहे. त्या भागातील रस्ते टप्याटप्याने बंद करण्यात आले आहे. श्रीमंत दगडूशेठ हलवाई गणपती मंदिरात मोदी दर्शन घेणार असून, या भागात मोठा पोलीस बंदोबस्त ठेवण्यात आला आहे. मोदींचा ताफा मंदिराजवळ थांबणार आहे.
लक्ष्मी रस्ता, टिळक रस्ता, फर्ग्युसन रस्ता परिसरात पोलिसांनी तात्पुरते कठडे उभे केले आहेत. सोमवारपासून चौकाचौकांत मोठा बंदोबस्त ठेवण्यात आल्याने मध्यभागाला छावणीचे स्वरूप प्राप्त झाले आहे. मध्यभागातील उंच इमारतींच्या छतांवर पोलीस कर्मचारी तैनात करण्यात आले आहेत. मोदींच्या ताफ्याला काळे झेंडे दाखविणे, निषेधाच्या घोषणा देण्याची शक्यता असल्याने पोलिसांनी पदपथावर थांबण्यास मज्जाव केला आहे. अनुचित प्रकार रोखण्यासाठी पाच हजार पोलीस तैनात करण्यात आले आहेत.