पुणे : पोषक हवामानामुळे सोमवारी (२४ जुलै) किनारपट्टी, घाटमाथा, विदर्भ आणि मराठवाड्याच्या पूर्व भागात पावसाचा जोर कायम राहण्याची शक्यता आहे. किनारपट्टी आणि पूर्व विदर्भात काही ठिकाणी अतिवृष्टी होण्याचा अंदाजही हवामान विभागाने वर्तवला आहे.
हवामान विभागाचे अतिरिक्त महासंचालक कृष्णानंद होसाळीकर म्हणाले, की पुढील पाच दिवस राज्यात मुसळधार पावसाचा अंदाज आहे. कोकण, मध्य महाराष्ट्रातील घाट परिसर, पूर्व विदर्भाच्या बहुतांश भागात जोरदार, तर काही ठिकाणी अतिवृष्टी होण्याची शक्यता आहे. मराठवाड्याच्या काही भागात मेघगर्जनेसह जोरदार पाऊस पडेल असा अंदाज आहे.
हेही वाचा >>> साताऱ्यातील महाबळेश्वर व जोर येथे विक्रमी पावसाची नोंद; पावसाची संततधार सुरूच
अकोल्यात १०७, महाबळेश्वरात १६४ मिमीची नोंद
रविवारी सकाळी साडेआठ वाजताच्या आकडेवारीनुसार, अकोल्यात १०७.९, अमरावतीत १५.६, बुलडाण्यात २, गडचिरोलीत ३, गोंदियात २.२, नागपुरात ६.७, वर्ध्यात २३.४, यवतमाळमध्ये २४ मिलीमीटर पावसाची नोंद झाली. रविवारी दिवसभरात विदर्भात पावसाचा जोर कमी झाला होता. कोकण किनारपट्टीवर डहाणूत १३.९, हर्णेत ३७.२, कुलाब्यात ३५.२, सांताक्रूजमध्ये ४८.६, रत्नागिरीत ६४ मिमी पाऊस झाला. मुंबईत रविवारी दिवसभर पावसाचा जोर कमी होता. मध्य महाराष्ट्रात घाट परिसर वगळता अन्य ठिकाणी हलका पाऊस सुरू होता. कोल्हापुरात ४७.७ मिमी तर महाबळेश्वरमध्ये १६४ मिमीची नोंद झाली. मराठवाड्यात रविवारी दिवसभर तुरळक सरी पडल्या.
हेही वाचा >>> सांगली: पावसाची संततधार सुरुच; चांदोलीत ७० टक्के पाणीसाठा
ऑरेंज अलर्ट देण्यात आलेले जिल्हे – पुणे, सातारा, कोल्हापूर, पालघर, रायगड. रत्नागिरी, सिंधुदुर्ग,
यलो अलर्ट देण्यात आलेले जिल्हे – ठाणे, मुंबई, संभाजीनगर, जालना, परभणी, हिंगोली, नांदेड, लातूर, अकोला, अमरावती, भंडारा, बुलडाणा, चंद्रपूर, गडचिरोली, नागपूर, गोंदिया, वर्धा, वाशिम, यवतमाळ.
