पुण्यात आज हेल्मेट सक्ती नाही; जिल्हाधिकाऱ्यांच्या नावाने बनावट संदेश

पुणे जिल्हाधिकारी यांच्या आदेशानुसार उद्यापासून सलग तीन दिवस पुण्यात हेल्मेट कारवाई होणार आहे. त्याकरिता ६०० अतिरिक्त वाहतूक पोलीस नेमण्यात आले आहेत. प्रभावी अंमलबजावणी होणार आहे. सर्वांनी सतर्क राहावे, असा संदेश मंगळवारी दिवसभर समाजमाध्यमांतून प्रसारित करण्यात आला. याबाबत जिल्हाधिकारी डॉ. देशमुख यांना विचारले असता, हा संदेश बनावट असल्याचे त्यांनी स्पष्ट केले.

हेही वाचा – पुणे: गौतमी पाटीलचा डान्स बर्थडे बॉयला पडला भारी; आयोजक बर्थडे बॉयवर गुन्हा दाखल

दरम्यान, गेल्या आठवड्यात जिल्हा रस्ता सुरक्षा समितीची बैठक पार पडली. त्यामध्ये शहरासह जिल्ह्यातील शासकीय अधिकारी, कर्मचाऱ्यांनी शासकीय कार्यालयात दुचाकीवरून येताना हेल्मेट परिधान करावे. हेल्मेट परिधान करून न येणाऱ्या अधिकारी कर्मचाऱ्यांचे सुरुवातीला प्रबोधन करावे. त्यानंतर कारवाई करण्याचा इशारा जिल्हाधिकारी डॉ. देशमुख यांनी दिला आहे. मात्र, सामान्य नागरिकांबाबत असे कोणतेही आदेश या बैठकीत देण्यात आलेले नाहीत.