समृद्धी महामार्गावर झालेल्या भीषण अपघातात पिंपरी- चिंचवडमधील मायलेकीसह सासूचा मृत्यू

नागपूरवरून निघालेल्या ट्रॅव्हलचा समृद्धी महामार्गावर मध्यरात्री भीषण अपघात झाला. यात होरपळून २५ जणांचा मृत्यू झाला आहे. हा अपघात एवढा भीषण होता की मृतांची ओळख पटविणे देखील कठीण झालेला आहे. देशाचे पंतप्रधान नरेंद्र मोदी, मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी घटनेची नोंद घेऊन मृतांच्या नातेवाईकांना आर्थिक मदत जाहीर करत मृतांना श्रद्धांजली वाहिली आहे. एकनाथ शिंदे, देवेंद्र फडणवीस यांनी घटनास्थळी जाऊन घटनेची माहिती घेत नातेवाईकांचे सांत्वन केले.

आणखी वाचा-समृद्धी महामार्गावर भीषण अपघात; शिरूर तालुक्यातील तिघांचा मृत्यू

समृद्धी महामार्गावर झालेल्या अपघातातील ट्रॅव्हल्समध्ये पिंपरी- चिंचवड शहरातील पिंपळे सौदागर येथे राहात असलेल्या वनकर कुटुंबातील दोन महिला आणि एका चिमुकलीचा मृत्यू झाला आहे. प्रणित वनकर हे संगणक अभियंते असून त्यांची आई, दोन वर्षीय मुलगी आणि पत्नी या नागपूर येथे लग्न समारंभासाठी गेल्या होत्या. प्रणित वनकर देखील गेले होते. परंतु, ते गेल्या आठवड्यातच पुण्यात परत आले आणि आई, मुलगी आणि पत्नी ट्रॅव्हल्सने येत असताना त्यांच्यावर काळाने घाला घातला आहे. या घटनेमुळे पिंपरी- चिंचवड शहरावरती शोककळा पसरली आहे.