पुणे : गरोदरपणातील प्रत्येक टप्प्यात शरीरात मोठे बदल होतात. त्यातील संप्रेरकांमधील बदल हे आतड्यांसंबंधी हालचाली मंदावण्यास कारणीभूत ठरतात. गरोदरपणात ‘प्रोजेस्टेरॉन’ नावाचे संप्रेरक पचनावर परिणाम करते आणि त्यामुळे बद्धकोष्ठतेचा त्रास होऊ शकतो. त्यासाठी आहारासोबत इतरही गोष्टींची काळजी घेण्याचा सल्ला आरोग्यतज्ज्ञांनी दिला आहे. गरोदरपणात शारीरिक क्रिया मंदावलेल्या असतात. त्यामुळे आतड्यांची हालचाल मंदावते. त्यामुळे पोट साफ होण्याची क्रिया हळूवार गतीने होते. त्यातून बद्धकोष्ठतेचा त्रास होऊ लागतो. गरोदर होण्याआधी तुमचे आतड्याचे आरोग्य चांगले असावे. हे निरोगी गर्भाकरिता फायदेशीर ठरते. आतड्यांची आरोग्य चांगले न राखल्यास गर्भधारणेत आव्हानांचा सामना करावा लागू शकतो. आतडे निरोगी असणे हे प्रत्येकासाठी महत्वाचे आहे, मात्र गर्भवती आणि स्तनपान करणाऱ्या महिलांसाठी हे अधिक गरजेचे ठरते. आतड्यातील मायक्रोबायोमचा नवजात बाळाच्या आरोग्यावरही परिणाम होतो. आतड्यासंबंधीत तक्रारी बाळाच्या रोगप्रतिकारक शक्तीवर परिणाम करतात, अशी माहिती मदरहूड हॉस्पिटलमधील आहारतज्ज्ञ डॉ. इंशारा महेदवी यांनी दिली. आणखी वाचा-सायकलसह पुणे मेट्रोतून प्रवास करा पण… काय उपाय करावेत? भरपूर पाणी प्या : शरीरात पाण्याचे प्रमाण योग्य राखणे गरजेचे आहे. पाणी, फळांचा रस, भाज्यांचे सूप, पेज अशाप्रकारे द्रव पदार्थांचे सेवन करावे.तंतूमय पदार्थांचे सेवन : आहारात तंतूमय पदार्थांचे सेवन अधिक प्रमाणात असावे. यामध्ये डाळी, भाज्या, पालेभाज्या, कडधान्ये, गहू यांचा समावेश असावा.एकाच वेळी जास्त जेवू नका : एकाच वेळी भरपेट न जेवता ठराविक अंतराने अन्नाचे सेवन करा. त्यामुळे पचन होण्यास मदत होईल.सक्रिय राहा : सतत एका जागी सतत बसून न राहता शारीरीक हलचाल करा. डॅाक्टरांच्या सल्ल्याने व्यायाम करा.आरामदायी कपडे हवेत : गरोदरपणात घट्ट कपडे घालणे टाळा, त्यामुळे अन्नाचे नीट पचन होऊ शकेल.चहा,कॉफी टाळा : चहा आणि कॉफीचे सेवन कमी करा. कारण त्यामुळे अपचन, गॅस आणि छातीत जळजळ होण्याची शक्यता असते.
