लोकसत्ता प्रतिनिधी
पिंपरी: पत्नीने सरपंचपदाचा राजीनामा देण्यासाठी १५ जणांच्या टोळक्याने पतीला सिमेंटच्या ब्लॉकने मारहाण केली. जीवे मारण्याची धमकी देत चारचाकीचे नुकसान केले. ही घटना ३० एप्रिल रोजी रात्री सव्वा एकच्या सुमारास माणगाव देवी मंदिरासमोर घडली.
या प्रकरणी सचिन मच्छिंद्र आढाव (वय ३९, रा.गणेशनगर, डांगे चौक) यांनी हिंजवडी पोलीस ठाण्यात फिर्याद दिली आहे. त्यानुसार रवी बोडके, राज बहिरट, प्रदीप पारखी, सोन्या बोडके, सचिन बोडके (सर्व रा. माण, ता.मुळशी) यांच्यासह इतर १० ते १२ जणांविरोधात गुन्हा दाखल करण्यात आला आहे.
हेही वाचा… पुण्यातील ए आर रेहमान यांचा शो पोलिसांनी थांबवला; मंचावर येऊन अधिकाऱ्यांनी सुनावले खडेबोल
पोलिसांनी दिलेल्या माहितीनुसार, फिर्यादी सचिन आढाव यांच्या पत्नी सरपंच आहेत. त्यांच्या पत्नीने सरपंच पदाचा राजीनामा द्यावा यासाठी आरोपींनी फिर्यादीच्या चार चाकीवर सिमेंटचे ब्लॉक मारून नुकसान केले. तसेच डोक्यात ब्लॉक मारले. जीवे ठार मारण्याची धमकी दिली. हिंजवडी पोलीस तपास करत आहेत.
