शरद पवार यांचे बारामतीकडे विशेष लक्ष, आज बारामतीत सहा सभा

लोकसभा निवडणुकीप्रमाणेच विधानसभेची निवडणूकही शरद पवार आणि अजित पवार यांच्यासाठी प्रतिष्ठेची ठरली आहे. बारामती शहराचे गेली पस्तीस वर्षे प्रतिनिधित्व करणारे राज्याचे उपमुख्यमंत्री अजित पवार यांच्यापुढे त्यांचे सख्खे पुतणे, राष्ट्रवादी (शरद पवार) पक्षाचे युवा नेते युगेंद्र पवार यांचे आव्हान असणार आहे. या दोघांनी गेल्या सोमवारी उमेदवारी अर्ज दाखल केल्यानंतर पवार कुटुंबीयांतील भावनिक राजकारणाला सुरुवात झाली होती. ‘घर फोडल्याचा’ आरोप अजित पवार यांनी केल्यानंतर या आरोपाला शरद पवार यांनीही स्पष्ट उत्तर दिले होते. ‘घर फोडण्याचे पाप कधी केले नाही, आणि तशी शिकवणही मला आई-वडील आणि भावांनी दिली नाही,’ असा हल्लाबोल शरद पवार यांनी केला होता. या दरम्यान, दिवाळीनिमित्ताने शरद पवार आणि अजित पवार या दोघांनीही स्वतंत्रपणे नागरिकांच्या भेटी घेतल्या होत्या.

हेही वाचा : हडपसर मधील नागरिक ‘ या’ कारणांमुळे त्रस्त !

बारामतीची निवडणूकही प्रतिष्ठेची ठरली असल्याने या निवडणुकीकडे राज्याचे लक्ष लागले आहे. या पार्श्वभूमीवर शरद पवार यांनीही बारामतीकडे विशेष लक्ष दिले असून नातवासाठी ते मैदानात उतरले आहेत. त्याअनुषंगाने शरद पवार यांच्या सभांचे आयोजन करण्यात आले आहे. या सभांना ‘स्वाभिमानी सभा’ असे नाव देण्यात आले आहे. यातील चार सभा ग्रामीण भागात तर दोन सभा बारामती शहरात होणार आहेत. बारामती तालुक्यातील शिर्सुफळ, सुपा येथील बसस्थानकाजवळ, श्री क्षेत्र मोरगाव येथील हाॅटेल शिवतारा येथे, सोमेश्वरनगर करंजे येथे कारखाना रस्ता परिसरात शरद पवार यांच्या जाहीर सभा होणार आहेत. त्यामुळे शरद पवार या सभांच्या माध्यमातून काय बोलणार, याकडे पक्षाच्या कार्यकर्त्यांचे लक्ष लागले आहे.