पुणे : एकटे राहणाऱ्या ज्येष्ठाची सोसायटीतील रखवालदाराने २४ लाख ४८ हजार रुपयांची फसवणूक केल्याचा प्रकार उघडकीस आला. हडपसर पोलिसांनी याप्रकरणाचा तपास करुन रखवालदारासह साथीदाराला अटक केली. इफ्तेखार रहीमखान पठाण (वय ३१, रा. गोवंडी, मुंबई), मोहम्मद हनीफ मोहम्मद अफसर (वय ५२, रा. म्हसोबा मंदिराजवळ, काळेपडळ, हडपसर, मूळ रा. पातूर, जि. अकोला) अशी अटक करण्यात आलेल्यांची नावे आहेत.
याबाबत एका महिलेने हडपसर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिला बंगळुरूत नोकरीनिमित्त वास्तव्यास आहेत. त्यांचे वडील हडपसर भागातील एका सोसायटीत राहायला आहेत. एकट्या राहणाऱ्या ज्येष्ठ नागरिकाशी साेसायटीतील रखवालदार पठाण याने ओळख वाढवून त्यांच्या बँक खात्याची माहिती घेतली.
बँक खात्याचा माहिती घेतल्यानंतर त्याने परस्पर खात्यातून २४ लाख ४८ हजार रुपयांची रक्कम ऑनलाइन पद्धतीने काढून घेतली. खात्यातून रक्कम परस्पर काढून घेण्यात आल्याचा प्रकार उघडकीस आल्यानंतर पोलिसांकडे तक्रार देण्यात आली. त्यानंतर पोलीस आयुक्त डाॅ. राजकुमार शिंदे, सहायक आयुक्त अनुराधा उदमले यांच्या मार्गदर्शनाखाली हडपसर पोलीस ठाण्याचे वरिष्ठ पोलीस निरीक्षक संजय मोगले, गुन्हे शाखेचे पोलीस निरीक्षक नीलेश जगदाळे, संदीप राठोड, गायत्री पवार, तेजस पांडे यांनी तपास सुरू केला.
तपासात ज्येष्ठ नागरिकाच्या बँक खात्यातील रक्कम कोणत्या खात्यात वळविण्यात आली, याची माहिती घेण्यात आली. तपासात ही रक्कम रखवालदार पठाण आणि अफसरच्या खात्यात वळविण्यात आल्याची माहिती मिळाली. या घटनेनंतर पठाण सोसायटीतील काम सोडून पसार झाला होता. तपासात पठाण आणि अफसर एकमेकांच्या संपर्कात असल्याची माहिती मिळाली. त्यानंतर दोघांना अटक करण्यात आली.
आरोपी पठाण हा अफसरचा मेहुणा आहे. ज्येष्ठ नागरिक घरात एकटे राहत असल्याने ते रखवालदार पठाणला काम सांगत होते. ते त्याला खरेदीसाठी पेैसे द्यायचे. पठाणने त्यांना मदत करण्याचा बहाणा करुन त्यांच्या बँक खात्याची गोपनीय माहिती घेऊन खात्यातून ऑनलाइन पद्धतीने रक्कम काढून घेतल्याचे उघडकीस आले. आरोपींना ३१ मार्चपर्यंत पोलीस काेठडीत ठेवण्याचे आदेश देण्यात आले. गुन्हे शाखेचे पाेलीस निरीक्षक नीलेश जगदाळे तपास करत आहेत.
एकटे राहणाऱ्या ज्येष्ठांनी घरकामास ठेवलेल्या अनोलखी व्यक्तींवर विश्वास ठेऊ नये. मदतीचा बहाणा करुन यापूर्वी शहरात ज्येष्ठांना लुटण्यात आल्याच्या घटना घडल्या आहेत, अशी माहिती पोलिसांनी दिली.