मावळमध्ये खासदारकीसाठी महायुतीमध्ये तीन पायांची शर्यत, आता बाळा भेगडेंचे भावी खासदार म्हणून लागले फ्लेक्स

मावळ : पुण्याच्या मावळमध्ये आगामी लोकसभेवरून महायुतीत वाद होण्याची शक्यता आहे. शिवसेनेचे विद्यमान खासदार श्रीरंग बारणे हे आगामी मावळ लोकसभेसाठी इच्छुक आहेत. तशी त्यांनी इच्छा बोलून देखील दाखवलेली आहे. असं असताना आता उर्से टोल नाका येथे भाजपचे माजी राज्यमंत्री बाळा भेगडे यांचे भावी खासदार म्हणून फलक लागले आहेत. मावळ लोकसभा मतदारसंघावर महायुती असलेल्या नेत्यांचा डोळा असल्याचं पुन्हा एकदा बघायला मिळालं. शिवसेनेचे विद्यमान खासदार श्रीरंग बारणे यांनी याआधीच मावळ लोकसभेवर दावा केला असून लोकसभा निवडणुकीची जोरदार तयारी सुरू केली आहे. तर दुसरीकडे भाजपचे माजी राज्यमंत्री संजय उर्फ बाळा भेगडे यांच्या वाढदिवसानिमित्त उर्से टोलनाक्यावर भावी खासदार असा उल्लेख असलेले फ्लेक्स लागले आहेत. तर अजित पवार यांनी देखील मावळ लोकसभेवर नुकताच दावा केला होता.