पिंपरी : भाजपने पिंपरी-चिंचवडमधील तीन विधानसभा मतदारसंघांसाठी १४ मंडल अध्यक्षांची नियुक्ती केली आहे. पिंपरी विधानसभेसाठी चार, चिंचवड आणि भोसरीसाठी प्रत्येकी पाच मंडल अध्यक्ष नेमले असून, त्यामध्ये आमदारपुत्र आणि समर्थकांना स्थान देण्यात आले आहे.
पिंपरी विधानसभेमध्ये चार मंडल अध्यक्ष नियुक्त करण्यात आले आहेत. त्यामध्ये विधान परिषदेच्या आमदार उमा खापरे यांचे चिरंजीव जयदीप खापरे यांची प्राधिकरण- चिंचवड मंडल अध्यक्षपदी, आकुर्डीगाव- शाहूनगर मंडल अध्यक्षपदी धरम वाघमारे, संत तुकारामनगर-खराळवाडी-कासारवाडी मंडल अध्यक्षपदी मंगेश धाडगे आणि फुगेवाडी-दापोडी-बोपखेल मंडल अध्यक्षपदी अनिता वाळुंजकर यांची नियुक्ती झाली आहे.
चिंचवड विधानसभेमध्ये एकूण पाच मंडल आहेत. रावेत- वाल्हेकरवाडी मंडल अध्यक्षपदी मोहन राऊत, चिंचवड-काळेवाडी मंडल अध्यक्षपदी हर्षद नढे, थेरगाव- वाकड मंडल अध्यक्षपदी सनी बारणे, रहाटणी- पिंपळे सौदागर मंडल अध्यक्षपदी सोमनाथ तापकीर आणि सांगवी-पिंपळे गुरव मंडल अध्यक्षपदी गणेश ढोरे यांची नियुक्ती झाली आहे.
भोसरी विधानसभेमध्ये पाच मंडल आहेत. त्यामध्ये चिखली-कृष्णानगर मंडल अध्यक्षपदी ॲड. योगेश सोनवणे, तळवडे- यमुनानगर मंडल अध्यक्षपदी रामदास कुटे, मोशी-चऱ्होली मंडल अध्यक्षपदी अजित बुर्डे, दिघी-गवळीनगर-गव्हाणे वस्ती मंडल अध्यक्षपदी अमोल डोळस आणि धावडे वस्ती- इंद्रायणीनगर- नेहरुनगर मंडल अध्यक्षपदी शिवराज लांडगे यांची नियुक्ती झाली आहे.
शहराध्यक्ष निवडीचा पेच
शहराध्यक्ष निवडीवरून भाजपमध्ये तीन गट पडले आहेत. एक गटाने विद्यमान शहराध्यक्ष शंकर जगताप यांनाच कायम ठेवण्याची मागणी पुढे केली. तर, दुसऱ्या गटाची कार्यकारी अध्यक्ष शत्रुघ्न काटे यांच्याकडे शहराध्यक्षपदाची धुरा सोपविण्याची मागणी आहे. अन्य एका गटाने संघटनेचा अनुभव, निष्ठावान कार्यकर्त्यालाच शहराध्यक्षपद द्यावे, अशी भूमिका घेतली आहे. त्यामुळे शहराध्यक्ष निवडीचा पेच निर्माण झाला आहे.
प्राथमिक सदस्य, सक्रिय सदस्य, बूथ कमिटीनंतर संघटन पर्वाच्या तिसऱ्या टप्प्यात मंडल अध्यक्षांची निवड करण्यात आली आहे. नवीन मंडल अध्यक्षांमुळे संघटनेला नवीन दिशा मिळेल. नवीन अध्यक्षांच्या नेतृत्वाखाली पक्ष अधिक मजबूत होईल. जनतेच्या समस्यांवर अधिक प्रभावीपणे काम करेल, असा विश्वास आमदार शहराध्यक्ष शंकर जगताप यांनी व्यक्त केला.
