पिंपरी : लिफ्टमध्ये घुसून शिक्षिकेला हातोडीने मारहाण

जखमी शिक्षिकेने सांगवी पोलीस ठाण्यात फिर्याद दिली आहे. सांगवीचे वरिष्ठ पोलीस निरीक्षक महेश बनसोडे यांनी दिलेल्या माहितीनुसार, फिर्यादी शिक्षिका या खासगी शिकवणी घेतात. तसेच घरी जाऊन विद्यार्थ्यांना शिकवण्याचे कामही करतात. गुरुवारी सायंकाळी चारच्या सुमारास फिर्यादी शिक्षिका या नेहमीप्रमाणे पांलाडे निवास येथील एका कुटुंबातील मुलाला शिकवण्यासाठी चालल्या होत्या. इमारतीच्या वाहनतळामधील लिफ्टमध्ये संबंधित विद्यार्थ्यांची आई आणि फिर्यादी शिक्षिका गेल्या. यावेळी त्यांच्या पाठीमागून आरोपी अचानक लिफ्टमध्ये आला. त्याने शिक्षिकेच्या डोक्यात, पाठीत आणि खांद्यावर हातोडीने मारून गंभीर जखमी केले. त्यानंतर शिक्षिकेच्या गळ्यातील दीड तोळे वजनाची ६० हजार रुपये किमतीची सोनसाखळी जबरदस्तीने हिसकावली आणि पसार झाला. पोलिसांनी परिसरातील सीसीटीव्हींची पाहणी केली. आरोपी सीसीटीव्हीमध्ये कैद झाला आहे. त्याआधारे पोलिसांची शोधमोहीम सुरू आहे. सहायक पोलीस निरीक्षक कलगुटके तपास करीत आहेत.

हेही वाचा : Cyber Crime: काय सांगता? वर्षभरात ४२९ करोडचा नागरिकांना गंडा; ३७ हजार तक्रारी, नेमकं सायबर पोलीस काय म्हणाले? वाचा..

लग्नाबाबत विचारल्याने तरुणीला हातोडीने मारहाण

तरुणीने मित्राला लग्नाबाबत विचारणा केली असता मित्राने तरुणीच्या डोक्यात हातोडीने मारून तिला गंभीर जखमी केल्याची घटना चाकण येथे मार्केटयार्ड चौकात घडली. जखमी तरुणीने चाकण पोलीस ठाण्यात फिर्याद दिली आहे. अभिषेक हेमंत लेंडघर (वय २४, रा. चाकण) याच्या विरोधात गुन्हा दाखल करण्यात आला आहे. फिर्यादी तरुणी आणि अभिषेक हे मित्र- मैत्रीण आहेत. तरुणीने अभिषेकला लग्नाबाबत विचारणा केली. त्यावरून अभिषेक याने तरुणीला लग्नास नकार देत हातोडीने तिच्या डोक्यात आणि हातावर मारले. त्यानंतर तरुणीच्या गाडीवर हातोडीने मारून गाडीचे नुकसान केले. तरुणीला त्रास होऊ लागल्याने त्या रुग्णालयात गेल्या असता तिथेही आरोपीने तरुणीला मारहाण केली. पोलीस हवालदार रेंगडे तपास करीत आहेत.