पिंपरी : नवीन वीजजोडण्यांची वाढती मागणी, सद्यस्थितीत असलेल्या वीजयंत्रणेवरील भार कमी करण्यासाठी चऱ्होली आणि मोशीत नवीन अतिउच्चदाब उपकेंद्र उभारण्यात येणार आहे. भोसरीतील उपकेंद्रात ५० एमव्हीए क्षमतेचे रोहित्र लावण्यात येणार आहे. याबाबतच्या प्रस्तावाला महावितरणचे अध्यक्ष व व्यवस्थापकीय संचालक लोकेश चंद्र यांनी मान्यता दिली. हा प्रस्ताव महावितरणकडून महापारेषणकडे पाठविण्यात आला आहे. नवीन उपकेंद्र उभारणे व क्षमतावाढ आदींची कामे महापारेषणकडून करण्यात येणार आहे.
या दोन नवीन अतिउच्चदाब उपकेंद्रांमुळे, उपकेंद्राच्या क्षमतावाढीमुळे महापारेषणच्या भोसरी, टेल्को, मरकळ या अतिउच्चदाब उपकेंद्रावरील वीजभार मोठ्या प्रमाणावर कमी होणार आहे. पिंपरी-चिंचवड शहरासह भोसरी, एमआयडीसी परिसर, चऱ्होली, प्राईड वर्ल्ड सिटी, दाभाडेवस्ती, लोहेगाव, धानोरी, मोशी, आळंदी, जाधववाडी, शिवाजीवाडी, तुपेवस्ती, चिंबळी, केळगाव, डुडळगाव, चोवीसवाडी, वडमुखवाडी, बोऱ्हाडेवाडी यासह महापालिकेच्या पाणीपुरवठा केंद्र, विद्युत वाहन चार्जिंग स्टेशन, सांडपाणी प्रक्रिया प्रकल्प, कचरा डेपोला सुरळीत वीजपुरवठा उपलब्ध होणार आहे. वीजपुरवठा खंडित होण्याच्या तांत्रिक प्रमाणात घट होईल. तसेच काही कारणांमुळे वीज खंडित झाल्यास सक्षम पर्यायी व्यवस्था उपलब्ध होणार आहे. वीजहानीमध्ये देखील घट होणार आहे.
सध्या अस्तित्वात असलेल्या महापारेषण कंपनीच्या भोसरी आरएस एक, दोन तसेच मरकळ, टेल्को व सेन्चुरी एन्का या पाच अतिउच्चदाब उपकेंद्रातून महावितरणच्या ३३ केव्ही व २२ केव्ही क्षमतेच्या एकूण ६६ वीजवाहिन्यांना वीजपुरवठा केला जातो. या सर्व वाहिन्यांचे विभाजन, लांबी कमी करून त्याचा वीजभार नव्याने उभारण्यात येणाऱ्या चऱ्होलीतील प्राईड वर्ल्ड सिटी व मोशीतील सफारी पार्क २२० केव्ही अतिउच्चदाब उपकेंद्रावर देण्यात येणार आहे. ‘अतिउच्चदाबाचे दोन नवीन उपकेंद्र व एका उपकेंद्राच्या क्षमतावाढीस मंजूरी दिली आहे. यातून ४०० एमव्हीएचा वीजभार उपलब्ध होणार आहे. अस्तित्वात असलेल्या पाच अतिउच्चदाब उपकेंद्रांवरील वीजभार कमी होईल. त्याचा सुरळीत वीजपुरवठ्यासाठी पिंपरी-चिंचवड, भोसरी एमआयडीसी परिसर आणि सुमारे २० गावांना थेट लाभ होणार आहे’, असे महावितरणचे मुख्य अभियंता राजेंद्र पवार यांनी म्हटले आहे.
