पुणे : महसूल गुप्तचर यंत्रणेच्या (डीआरआय) पथकाने पुणे परिसरातून तब्बल ५० कोटी रुपयांचा १०१ किलो मेथाक्युलोन हा अंमली पदार्थ जप्त केला आहे. पुणे परिसरातून एवढ्या मोठ्या प्रमाणावर अमली पदार्थ जप्त करण्यात आल्याने खळबळ उडाली आहे. याप्रकरणी डीआरआयच्या पथकाकडून तेलंगणा, महाराष्ट्र, दिल्ली आणि हरियाणा येथील रहिवासी असलेल्या पाच जणांना अटक करण्यात आली. अमली पदार्थ विरोधी कायद्यातील (एनडीपीएस कायदा १९८५) तरतुदीनुसार ही कारवाई करण्यात आली. हेही वाचा : २५० कोटी हवेत?…मग ‘हा’ बदल करा; केंद्राचा पुणे महापालिकेला आदेश डीआरआयच्या अधिकाऱ्यांना मिळालेल्या गुप्त माहितीच्या आधारे पुण्यातून एक वाहन जप्त करण्यात आले होते. वाहनात पांढरे स्फटिकाचे साहित्य असलेले ४ निळ्या रंगाचे प्लास्टिकचे ड्रम आढळून आले. यामध्ये मेथाक्युलोन हा पदार्थ आढळला. अटक करण्यात आलेले आरोपी बेकायदा विक्री, खरेदी, वाहतूक आणि निर्यातीत गुंतलेले असल्याचे प्राथमिक तपासात आढळून आले आहे. मेथाक्युलोन अमली पदार्थ विक्रीचे जाळे देशातील अनेक राज्यांमध्ये पसरलेले असल्याची शक्यता असून, त्याअनुषंगाने तपास करण्यात येत आहे.
