पिंपरी-चिंचवडमधील बेकायदा ‘रूफटॉप’ हॉटेलवर हातोडा

पिंपरी-चिंचवड शहरात वाकड, पिंपळे सौदागर, पिंपळेगुरव, थेरगाव या भागांत रूफटॉप हॉटेलची संख्या मोठ्या प्रमाणात आहे. इमारतीच्या गच्चीवर कोणतीही परवानगी न घेता हे हॉटेल बेकायदेशीरपणे चालविले जात आहेत. शहरातील खवय्ये व मद्यपी मोठ्या संख्येने अशा हॉटेलना प्राधान्य देत आहेत. त्याठिकाणी मोठमोठे किचन असतात मात्र, त्यासाठी आवश्यक ते परवाने घेतले जात नव्हते. गच्चीवर अनधिकृत बांधकाम करून रूफटॉप हॉटेल बांधण्यात आली असताना कारवाई न करता त्यांना अधिकृत करण्यासाठी महापालिका प्रशासनाने हालचाली सुरू केल्या होत्या. यामुळे प्रशासनावर टीका झाल्याने बेकायदेशीर रूफटॉप हॉटेलवर कारवाईस सुरुवात केली आहे.

हेही वाचा : पुणे : नमो ११ सूत्री कार्यक्रमाअंतर्गत ७३ आश्रमशाळांमध्ये विज्ञान केंद्र

त्यानुसार ड क्षेत्रीय कार्यालय हद्दीत सात, तर ग क्षेत्रीय कार्यालय हद्दीत दोन अशा नऊ हॉटेलवर आतापर्यंत कारवाई करण्यात आली आहे. शहरातील काही हॉटेलचालकांकडे महापालिकेचा बांधकाम परवाना, अग्रिशमन विभागाचा ना-हरकत दाखला नाही. तसेच, महापालिकेचा बिगरनिवासी मिळकतकरही भरला जात नाही. त्यामुळे महापालिकेचे दरवर्षी कोट्यवधींचे आर्थिक नुकसान होत आहे.

हेही वाचा : मराठा समाजाबद्दल अवमानकारक वक्तव्य; छगन भुजबळ यांना कायदेशीर नोटीस

शहरातील विविध भागांत ४८ रूफटॉप हॉटेल असल्याची माहिती अग्निशमन विभागाने गेल्या महिन्यात दिली होती. आता मात्र ड आणि ग क्षेत्रीय कार्यालय हद्दीमध्येच रूफटॉप हॉटेल असल्याचे प्रशासनाकडून सांगण्यात आले. ड क्षेत्रीय कार्यालय परिसरातच २१ रूफटॉप हॉटेल आढळून आले आहेत. या बेकायदेशीर असलेल्या रूफटॉप हॉटेलवर कारवाई केली जाणार आहे.