पुणे: लष्करात नोकरीच्या आमिषाने फसवणूक करणारा जवान ताब्यात; लष्करी गुप्तचर यंत्रणेची कारवाई

पुणे : लष्करात नोकरीच्या आमिषाने तरुणाची फसवणूक करण्याचा प्रयत्न करणाऱ्या एका जवानाविरुद्ध बंडगार्डन पोलिसांनी गुन्हा दाखल केला. लष्करी गुप्तचर यंत्रणेकडून (मिलिटरी इंटलिजन्स) ही कारवाई करण्यात आली. शत्रुघ्न तिवारी (वय २६, रा. गणेशकृपा चाळ, कल्याण, जि. ठाणे) असे गुन्हा दाखल केलेल्याचे नाव आहे. याबाबत एका तरुणाने बंडगार्डन पोलीस ठाण्यात फिर्याद दिली. तक्रारदार तरुण सिंहगड रस्ता परिससरात राहायला आहे. आरोपी तिवारीने लष्करात भरतीची संधी, अशी जाहिरात समाजमाध्यमात प्रसारित केली होती. जाहिरात वाचल्यानंतर तक्रारदार तरुण तिवारीच्या संपर्कात आला. तिवारीने लष्कर भरतीचे आमिष दाखवून तरुणाकडे तीन लाख रुपयांची मागणी केली.